Къараучуланы толкъун къарслары – ыразылыкъларыны шагъаты

Бу  кюнледе Дагъыстанны  Э. Капиев атлы  Лаклы  къырал музыкалы-драма театры  "Культура" миллет проектге кёре Нальчикге келгенди. Быллай гастрольла Россейни халкъларын бирикдирир, бир бирни адет-тёрелерин, маданият хазналарын билирча, хурметлерча этер муратда къураладыла. 
 

Дагъыстанлы артистле бизни къараучуларыбызгъа Шогенцуков атлы Къабарты театрда Н.Гогольну "Ревизор" чыгъармасына кёре  салыннган сахна оюнну эмда "Айболит" деген жомакъны келтиргендиле. Аланы  баш режиссёр, Дагъыстан Республиканы  халкъ артисти  Аслан  Магомедов салгъанды.

Ол театр бизни республикагъа биринчи кере келмегенин айтханды. «Къараучуларыгъыз бизге не заманда да   бек жарыкъ тюбейдиле, бу жол да алай болгъанды. Эрттенликде сагъат онда сабийлеге "Айболитни" кёргюзтген эдик да, къызчыкъла бла жашчыкъла аны бек жаратхандыла. Тюшде уа  "Ревизоргъа" къараргъа да кёпле келгенлерин кесигиз да кёресиз. Аланы жыл санлары да  башха-башхады. Артистге уа андан сора не керекди»,- дегенди.

Оюн бошалгъандан сора, артистлени барысы да сахнагъа чыкъгъанларында, залда олтургъанла, ёрге туруп, иги кесекге дери  къарс къагъып, къонакълагъа ыразылыкъларын билдиргендиле.

Мен а, бир ненча къараучугъа тюбеп, ушакъ этгенме. Нурмагомедова Фая аварлы болгъанын, аны себепли  театрны юсюнден эшитгенимлей, бек сюйюп  келгенин айтханды. «Туудукъларым бла жомакъгъа да къарагъанбыз, артда уа – башха спектакльге.Сабийле унамазла, къыйналырла деп къоркъа эдим да, ала  уа  бек тынч олтуруп къарагъандыла эки оюннга да. Сёзсюз, Гогольну "Ревизорун" окъумагъан бир адам да болмаз, алай бу театрны сахна оюнуна къарап, мен уллу зауукълукъ тапханма. Сау болсунла, артистле, аланы бери келирлерине себеплик этгенле да»,-дегенди ол.

Селеванова Соня уа паркга солургъа келип, театргъа кёп адам  киргенлерин кёрюп, алай бла тюшгенди спектакльге. «Бир да сокъуранмайма. Билетни багъасы да артыкъ уллу тюйюл эди. Жаш заманымы эсиме тюшюрдюм»,-дегенди ол. 
Чочайланы Толик университетде окъугъанын, иш этип келгенин да айтханды. «Бу сахна оюннга бу жолгъа дери да къарагъанма, алай артистле асыры иги ойнагъанларындан, кесими театрда болгъанымы да унутхан эдим. Бек ыразы болдум келгениме, кёргениме да»,-дегенди.

Суратланы автор алгъанды