Бизнес бла кюрешгенлеге - аслам кредитле

Россельхозбанкны Къабарты-Малкъарда бёлюмю гитче эмда орта бизнес бла кюрешгенлеге берген кредитлени ёлчеми 477 миллион сомгъа жетгенди. Аны да къошуп тергегенде, бёлюмню битеулю кредит портфели жети жюз миллион сомдан атлагъанды, деп билдиргендиле финанс учреждениядан.

«Албир» эл мюлк предприятияны башчысы Инал Алакаев айтханнга кёре, банк берген кредитге ала урлукъла, минерал семиртгичле, битимлени заранлы къурт-къумурсхаладан къоруулагъан препаратла, отлукъ эм башха керек затла сатып алгъандыла. Предприятияны жумушларына бу учрежденияда бек тынгылы къарайдыла, деп белгилегенди ол.

Быйыл кезиулю сабан ишлени тындырыргъа банк 291 миллион сом жибергенди. Энтта да 360 миллион сомну юсю бла заявкалагъа къарайдыла шёндю.

- Саулай айтханда, бёлюмде гитче эмда орта бизнес бла кюрешгенлени финансла бла онгдуруугъа бёлюмде тийишли магъана бериледи, - дегенди аны келечиси Залим Алоков.  - Бу категориялагъа деп жыйырмадан артыкъ программа жарашдырылгъанды. Ахчаны ала производствону къурау, продукцияны жарашдырыу эмда чыгъарыу жумушлагъа, бизнесни кенгертиуге эмда жангыртыугъа да къоратыргъа боллукъдула.