Жангы оборудование – бютюн уллу онгла

КъМР-ни Саулукъ сакълау министерствосу  стационар паллиатив бёлюмлеге эмда  саусузлагъа юйлеринде багъарча къырал бюджетден бёлюннген  14 миллион сомдан асламгъа медицина оборудованиядан 58-син  алгъанды.  

Бюгюнлюкде саусузланы бир къауумуна юйлеринде хайырланырча  портатив  кислород концентраторла,  небулайзерле эм  инсуфлятор-аспираторла берилгендиле.  Стационарла да  кислород концентраторла, вертикализаторла, массаж этген столла эм жууундурургъа элтирча каталкала бла жалчытылыннгандыла. Жууукъ заманда   солургъа болушхан ИВЛ аппарат бла медицина аспираторланы келтирирлерин  сакълайдыла.   

КъМР-ни саулукъ сакълау министрини къуллугъун толтургъан  Марат Хубиев   паллиатив   болушлукъ бериуге ведомство аслам эс бургъанын, бу жаны бла  жангы оборудование  ахшы себеплик этеригин да айтханды. Аны бла бирге службаны ишин  игилендирирча мадар этилгенин, 2018-2019 жыллада Регион аралы клиника диагностика арада (МКДЦ) бла Заюковну ара больницасында паллиатив бёлюмле ачылгъанларын эсгертгенди. Келир заманда Районла аралы кёп профильли больницада да аллай онг тапдырыллыгъын, саулай айтханда уа республикада  55 саусузгъа жатар жер къураллыгъын билдиргенди.