Жаш режиссёрланы чыгъармачылыкъларына себепликге

«Жаш тёлю миллет кинопремияны» финалына ётген  режиссёрланы атлары белгили болгъандыла.  Ала Россейни он регионундан онтогъуз кинематографистледиле.

Асламысында  жаш режиссёрланы автор киноларына себеплик керек болуучуду.  Бу жаны бла жолларын энди башлагъанла кёбюсюнде кеслерини къараучуларын тапмаучудула, коллегаларыны араларында тийишли даражагъа жеталмай къыйналыргъа да тюшюучюдю, кинофестивальлагъа къатышыргъа да тынч тюйюлдю алагъа.  Кинопремия уа жаш режиссёрланы уллу киногъа ол биринчи атламлары болур деген умут бла къуралгъанды.

Аны баш борчу россей  кинематографияда фахмулу жаш адамланы ачыкълауду, жаш авторла жарашдыргъан фильмлени  социал-маданият даражаларын кётюрюудю эмда алагъа къараучуланы сейирлерин къозгъауду. Айта кетерге тийишлиди, 2019 жылда  приемиягъа  заявкаланы 18 жылдан 30 жылгъа дери  къыралны башха-башха регионларындан 225 адам бергенди. Аны шорт-листине Воронеж, Челябинск, Москва, Свердлов, Ярослав областьладан, Къабарты-Малкъар Республикадан, Хакасия Республикадан, Пермь, Краснодар крайладан, Москва шахардан кинорежиссёрла тюшгендиле.  Финалгъа чыкъгъанла кеслерини ишлерин Москино сетьни майданларында кёргюзтюрге онг табарыкъдыла.

2019 жылда 28 ноябрьде «Иллюзион» кинотеатрда  хорлагъанланы къууанчлы халда белгилерикдиле.  Алчыла, призёрла да спонсорладан саугъала аллыкъдыла.  Энчи номинацияда биринчи болгъан а  MEGOGO уллу видеосервисни саугъасына тийишли боллукъду: аны майданларында кесини чыгъармасын кёргюзталлыкъды.

«Жаш тёлю миллет кинопремияны» къураучусу «Роскультцентр» ФГБУ-ду. Аны партнёрлары – РФ-ни Кинематографистлерини союзуну Жаш тёлю арасы, Россейни Анимация киносуну ассоциациясы, Мобил кинону тийреси, АРКА Кинону бийик школасы, ВГИК, Москино, MEGOGO, Госфильмофонд, Иллюзион, Кинематографист бла театр искусствону Н.С. Михалков атлы академия.

Эсгертиу  халда:
2018 жылда 21 декабрьде Москвада биринчи «Жаш тёлю миллет кинопремияны» алчыларыны саугъалау байрам къуралгъанды.  Ары искусствода бла культурада атлары айтылгъан адамла жыйылгъандыла: режиссёр Юрий Норштейн, актрисала Полина Максимова, Рина Гришина, бериуле бардырыучу Дильбар Файзиева, кинопродюсер Илья Бачурин, актёр Владислав Канопка, жаш актриса Марина Лобанова эм башхала. Жюрини къауумунда да тийишли профессионалла олтургъандыла.  Ишлери эм игилеге саналгъан жаш кинематографистлеге экшн-камерала берилгендиле эмда ала AMEDIA киностудияны энчи саугъаларына тийишли болгъандыла.