Жаш дипломатланы биринчи атламлары

Къабарты-Малкъар къырал университетде  белгили алим, къырал къуллукъчу  Евгений Примаков туугъанлы токъсан жыл толгъанына жоралап  «Тамблагъыны дипломатиясы» деген конференция башланнганды.  Анга КъМКъУ-ну студентлери бла Нальчикни  4-чю номерли гимназиясыны, Атажукино элни  3-чю номерли орта школуну, Куркужинни 1-чи номерли орта школуну профильли классларыны  окъуучулары къатышхандыла. 

Конференцияны магъанасы Евгений Примаков  илму бла   дипломатия бёлюмлени айныууна салгъан   къыйынны, Россейде   дипломатияны тарыхын,   болумун, ол  санда къыралны геополитика эм халкъла аралы байламлыкъла жаны бла да къарамын  тинтиргеди. 

Жаш дипломатланы ишлерине багъа бичгенле уа  КъМР-ни Парламентинде миллетлени арасында байламлыкъла къурау бла  законодательство, къырал строительство  эм жер-жерли самоуправление жаны бла комитетлерини келечиси Касболат Дзамихов, битеуроссей халкъ фронтну (ОНФ) республикада бёлюмюню исполкомуну таматасы  Евгений Бакаев, КъМР-ни Парламентини право жаны бла управлениясыны таматасы  Аслан Хамуков, жангы гуманитар институтну таматасы Муслим Тамазов,  орунбасары Геграланы Хаким, право, экономика эм финансла жаны бла институтну  кафедрасыны эм  РАН-ны КъМР-де илму-жарыкъландырыу арасыны таматасы Алексей Абазов, араны алчы специалисти Диана Лакунова эм ОНФ-ни келечиси, радиожурналист Ислам Макоев болгъандыла. 

Жыйылыу алимни, журналистни, дипломатны, разведканы башчысыны, тыш къыралланы ишлери жаны бла министрни, премьер-министр Евгений Примаковну   жашаууна эм урунуу жолуна  жораланнган адабият-музыка  экспозициядан башланнганды.  

Школчула Евгений Максимовични  Киевде туугъанын, Тбилисиде бла Бакуда ёсгенин, Москвада биринчи  жетишимле этгенин, иши бла байламлы Каирде, Багдадда,  Иракда да бола тургъанын айтхандыла,  ол тюзлюкню излей  таматала бла  аз даулашмагъанын да   сагъыннгандыла. 

- Россейни тарыхын Евгений Примаковча белгили адамла къурай  келедиле. Аны къыралны айныууна салгъан къыйынын тинтирге къыйынды. Бюгюн сиз бу жаны бла биринчи атлам этгенигиз чыгъармачылыкъ ишигизде магъаналы жерни аллыгъы  баямды. Барыгъызгъа да ишлеригизни жетишимли къорууларыгъызгъа   тежейме, - дегенди жаш адамлагъа Рима Нагоева. 

Касболат Дзамихов а  Евгений Максимович саулай жашауун Ата журтуна къуллукъ этиуге, халкъыны оюмун къоруулаугъа жоралагъанын белгилей, жаш тёлюге андан эм анычаладан юлгю  алыргъа, тиллени билирге, илму бла  кюреширге чакъыргъанды. Муслим Тамазов да  политикни ишин  аны жетишимлери кёргюзтгенлерин чертгенди.  
Конференция эки кюнню барлыкъды. Аны чеклеринде «Е.М. Примаковну наследиясы», «Тамблагъыны дипломатиясы», «Дипломатия - бетледе», «Студентле, школчула эм жаш алимле бардыргъан тинтиу ишле», «Биринчи сынам» деген номинациялада отуз доклад окъуллукъду. Андан сора да,  «II Кавказская модель ООН «Очаг мира» деген темагъа аталып  «тёгерек стол» ётерикди. 

Ахырында форумгъа къатышханланы барысына да энчи сертификатла берилликдиле.