Приёмгъа келгенлени тарыгъыулары бла байламлы тийишли оноула чыгъарыладыла

КъМР-ни прокуроруна приёмгъа келгенлени тарыгъыулары тинтилип, тийишли мадарла толтуруладыла.

Ведомстводан бизге билдиргенлерича, тюбешиуде эр киши ол арендагъа алгъан жерге  башха адам кирип, аны къайтарыргъа унамагъанын, ол угъай, аны къоркъутургъа кюрешгенин билдиргенди. Прокуратураны жууаплы къуллукъчулары бу иш бла байламлы шартланы тинтгендиле. Аладан белгили болгъаныча, эр киши анга этилген терсликлени юслеринден полициягъа заявление жазгъанды,  тинтиуле бадырылып, уголовный иш ачмазгъа деген оноу чыгъарылгъанды. Алай прокурор шартла толусунлай сюзюлмегенлерин белгилеп, оноуну кючюн тохтатханды.

Б. деген биреулен  А. инсан аны ёлтюрлюкме деп къоркъутханы бла байламлы уголовный иш тийишлисича тинтилмегенин билдиргенди. Жууаплы органла А.-ны ишинде бузукълукъ жокъду деп, уголовный ишни тохтатыуну  юсюнден оноуну бир ненча кере чыгъаргъандыла. Болсада прокурор аны терслигин белгилегенди.

Республиканы прокуратурасы уголовный ишни полицияны жууаплылыгъындан Следственный комитетни республикада бёлюмюне бергенди.   Уголовный иш къалай тинтилгени контрольгъа алыннганды.

Бир тиширыу а хыйлачыла аны фатарын сыйыргъанларын билдиргенди. Заявление эмда шартла сюзюлгенден сора республиканы прокуратурасыны эсгертиулери бла РФ-ни МВД-сыны «Урванский» бёлюмюню следствие  органлары РФ-ни УК-сыны 159-чу статьясыны 4-чю кесегине кёре уголовный иш ачхандыла (хыйлачылыкъны хатасындан  инсан жашау журтун тас этгени ючюн).

Прокуратурагъа республиканы инсаны сёлешип, анга пенсиясы терс тергелгенини  юсюнден билдиргенди. Ачыкъланнганыча, тиширыугъа жыл санына кёре страховой пенсия тёленеди. Аны бла бирге анга республикада жашау этерге жетерик ахчаны ёлчемине жетдирир ючюн къошакъ болушлукъ этилгенди.   Быллай себеплик а ишлемеген пенсиячылагъа бериледи. Къошакъ болушлукъ тохташдырылгъанда, тиширыугъа ишге кирсе, аны  юсюнден беш кюнню ичинде билдирирге кереклиси ангылатылгъанды. 

 Пенсия фондну жер-жерли бёлюмюне тиширыу 2017 жылда июньда ишге киргенини юсюнден шартла белгили этилгендиле. Алай бла анга федерал къошакъ себеплик тёленмей тебирегенди. Аны бла бирге артыкъ тёленнген ахча артха сыйырылгъанды. Законла бузулмагъанлары бла байламлы прокуратура оноу чыгъармагъанды, тиширыугъа уа законланы энчиликлери ангылатылгъандыла.