Диктантны магъанасы – жамауатны билимин ёсдюрюргеди

Кёп болмай Къабарты-Малкъар къырал университетде «Географиядан диктант» деген кезиулю халкъла аралы акция болгъанды. Ол РФ-ни  Президенти,  Орус география обществону (РГО) попечитель советини  таматасы Владимир Путинни башламчылыгъы бла жыл сайын бардырылады. Аны магъанасы -  жамауатны географиягъа эсин  бурургъады, кереклисин ангылатыргъады эм ата журтларын игирек танырча, сюерча этергеди.   

Бу жол анга  КъМР-ни Бийик тау геофизика институтну таматасы Беккиланы Мухтарны башчылыгъында учрежденияны келечилери, вузланы химия бла биология бёлюмлерини студентлери,  преподавательлери, школчула - саулай да 200-ден аслам адам - къатышханды. Эсге сала айтсакъ, диктантны жыл санлары 8-ден башлап 60-ха дери жетген хар ким да РГО-ну  сайтында регистрацияны ётюп жазаргъа эркинди.  

Диктант жазылырны аллында  КъМКъУ-ну вузгъа дери хазырлаудан  эм  къошакъ билим бериуден проректору Артур Кажаров Беккиланы Мухтаргъа Орус география обществогъа киргенине шагъатлыкъ этген удостоверение бергенди.  

Ол кюн акциягъа къатышханланы алгъышлай, КъМКъУ-ну илму-излем эм инновацияла жаны бла управлениясыны таматасы Сергей Шагин эм химия бла биология институтну таматасы Арсен Хараев да сёлешгендиле. 

Программагъа кёре  географиядан викторина да ётгенди.  Анда ведущийлени сорууларына биринчи жууап бералгъанла   КъМКъУ-ну белгилери  бла саугъаланнгандыла.  

Диктантны кезиуюнде  уа   40 минутну ичинде 40  соруугъа жууап берирге керек эди.  Ол кеси да   къыйынлыгъына кёре  эки кесекге бёлюннгенди. Аны  биринчиси он экинчиси уа 30 соруудан къуралгъанды.   

Аны  эсеплери 29 ноябрьден сора белгили боллукъдула. Ишлерине къаллай багъа бичилгенин билирге сюйгенле  РГО- «Диктант»: diktant.rgo.ru  сайтда энчи номерлерин айтып  шагъырей болаллыкъдыла.