Казна юй не иги болса да, сабий жаланда юйюрде насыплыды

КъМР-ни Урунуу эмда социал къоруулау министерствосуну  "Намыс» социал-реабилитация учреждениясына юйюрлеринде  хал тапсыз болуп къыйналгъан  сабийле тюшедиле. Аллайлагъа уа  энчи  болумла, кёз-къарам  керекдиле. Мында алагъа къаллай онгла къуралгъанларыны юсюнденди бизни  бу социал араны  директору Адальби Карданов бла ушагъыбыз. 

-Адальби Барасбиевич, бир ненча жыл мында алгъа  мен «Намысда» болгъанымда, учрежденияны эки мекямына да  тынгылы ремонт этилгенин кёргенме. Андан бери не тюрлениуле болгъандыла?

-Ол заманда сабийле жукълагъан отоулада жангы ундурукъла, шкафла салыннгандыла, дерслерин этерча онгла къуралгъандыла, бош заманларында телевизоргъа къарарча уллу, жумушакъ диванла да алыннгандыла.

Тюрлениулени юслеринден айтханда уа,быйылгъы жыл кёп жаны бла да хайырлыды десем, ётюрюк болмаз. Бек алгъа ашханабыз толусунлай  жангыртылгъанды. Анга  жангы столла, шкафла, адырла, керекли оборудование  да алыннгандыла. Ала арт онжети жылны ичинде бир кере да алышынмагъан эдиле. 

Дагъыда быстыр жуугъан юч машина къоллу болгъанбыз. Жууукъ заманда уа энтта бирин – бютюн кючлюсюн – алыргъа деп турабыз. 

-Башха блокланы жангыртыр планыгъыз а бармыды?

-Ючюнчю блокну   экинчи къатысында ремонт ишле  бу кюнледе къыстау барадыла. Бусагъатда сабийле жукълагъан отоулада полланы линолеумлары алышындырыладыла. Энди  бийик качестволу ламинат салынырыкъды. Жангы эшикле да орнатыллыкъдыла. Полла, эшикле да бу мекям хайырланылыргъа берилгенли алышындырылмагъандыла, аны себепли иги да тозурагъандыла.

Битеу ол тюрлениуле республикалы бюджетден бёлюннген ахчагъа эмда министерствону уллу себеплиги этилгенлерин белгилерге сюеме.

-Ол ишле къачаннга бошалыргъа керекдиле?

-Биз мурат этгенча  болса, сууукъла тюшгюнчю  къызчыкъла бла жашчыкъла жангы, ариу жарашдырылгъан отоулагъа кёчерикдиле. Тапландырыу  ишле теркирек бошалыр ючюн биз КъМР-де УФСИН бла келишим этгенбиз. Биз бу ведомство бла бу жолгъа дери да ишлегенбиз, ала айтхан сёзлерине  табыллыкъларына ишегибиз жокъду.

- Къыш сууукъла жетип келедиле, ол кезиуге уа къалай хазырланнгансыз?

-Белгиленнген заманда сантехника, суу  ызла эмда жылытыучу система тынгылы тинтилгендиле. Быйыл ол жаны бла бир тюрлю чырмау чыкъмазына, сабийле апчымазларына бек ышаныпбыз. Жылыу бериуню  заманында башлагъанбыз, бусагъатда мекямда керекли температура барды.

Сабийлени жылы юс эм аякъ кийимле бла жалчытыуну къайгъысын да этгенбиз. Ала керекли тенгли бир алыннгандыла. 

-Кёпле бу учрежденияны  интернатха неда сабийлени  башхаладан  айырып тутхан жерге санайдыла. Сабийлери кёп болуп, къыйын болумгъа  тюшген ата-аналаны бир къаууму сизге балаларын  жиберирге унамайдыла. Ол алай болмазча къаллай мадарла этесиз?

-Бек алгъа, мени оюмума кёре, акъылбалыкъ болмагъанланы ишлери  эм аланы аманлыкъдан сакълау бла кюрешген органла быллай учрежденияланы юслеринден  жамауатха терк-терк билдире турургъа керекдиле. Мында профилактика ишле да  бардырыладыла,  медицина, психология эмда  сабийлеге бла аланы ата-аналарына  башха болушлукъ  да этиледи. 

Ол жумушла къызчыкъланы неда жашчыкъланы  психикаларына заран салынмай, даражаларын да тюшюрмей тамамланыладыла. Алагъа мында башха керекли болушлукъ бла бирге окъургъа, «Намыс» бардыргъан  тюрлю-тюрлю ишлеге къатышыргъа онг бериледи. Ол а сёзсюз, аз тюйюлдю.

Бери тюшгенлени арасында юйлеринде къарынлары тоюп ашарча болмагъанла бардыла. Мында  уа  алагъа  кюннге беш кере татыулу эм татымлы азыкъ ашатадыла,   юс эм аякъ кийимле бла жалчытадыла, саулукъларына багъадыла.Керек болса уа, заманында тийишли медицина учреждениялагъа, ол угъай да, санаторийлеге окъуна  жибередиле.  Дагъыда бизде  сабийле жюрек къыйынларын, тарыгъыуларын билдирирча  ышаныулукъну телефону  ишлейди. Аны номери былайды: 8-800-2000-122. 

Бу тизмени андан ары  бардырыргъа да боллукъма...  Алай мында не къадар иги болса да, сабий юйюндеча, юйюрюндеча насыплы болалмайды, аны себепли мен абаданланы аны унутмазгъа чакъырама.