Уллайгъанлагъа - аламат жырла, жарыкъ тепсеуле

Черек районда уллайгъанланы жокълау, алгъышлау, саугъалау ахшы тёреге айланнганды. Алагъа къуралгъан тюбешиуле  бир бирлерин тансыкъларгъа, ушакъ этерге,  солуп, зауукълукъ алыргъа да онг бередиле. Аллай къууанчны таматалагъа кёп болмай районну Маданият юйюнде ишлегенле да къурагъандыла. Ала  социал болушлукъ берген арада тургъанлагъа сейирлик концерт программа жарашдырып, саугъа этгендиле.   

Ол башланырдан алгъа араны директору  Улбашланы Миналдан сёлешип, жашаулары келгенлени жюрек халаллыкълары, кёп жылланы бет жарыкълы уруннганлары,  жаш тёлюню юйретиуге къыйын салгъанлары ючюн  ыспас этгенди. Бу байрамны къурагъанлагъа да жюрек ыразылыгъын билдиргенди. 

Андан сора сахнагъа Маданият юйню     артистлери  Къадырланы Джанита, Алчакъланы Артур,  «Аламат» ансамбль эмда Къашхатауну орта школуну жаш фахмулары Азаматланы Айла, Акъкъызланы Камила, Къадырланы Карима, Османланы Алийхан да чыгъып, ариу жырлары, тепсеулери, назмулары бла къууандыргъандыла.  Анга уа аланы толкъун къарслары шагъатлыкъ этгендиле. Аны къой, таматала кеслери да  артистле бла бирге жырлагъандыла.  

Ол кюн Пенсия фондну район бёлюмюнде ишлегенле уа  уллайгъанланы татлы аш-суу бла сыйлагъандыла, деп билдиргендиле Черек районну администрациясыны пресс-службасындан.