Абаданла мында не заманда да болушлукъ, себеплик, ангылаулукъ да табадыла

Жыл сайын октябрьде, Уллайгъан адамны кюнюне жораланып, «Жандауурлукъ» деген тёрели айлыкъ бардырылады. Анга кёре аппалагъа бла аммалагъа деп тюрлю-тюрлю социал эмда маданият жумушла толтуруладыла. Ол огъурлу ишге уа бек алгъа социал службада ишлегенле къатышадыла. Ма аладыла абадан адамла бла тюзюнлей байламлы болгъан, аланы жарсыуларын, къайгъыларын да билген, хар жаны бла да эс тапдырыргъа кюрешген.

Элбрус районда халкъны социал жумушла бла жалчытыучу ара да, жандауурлукъну айлыгъына олсагъат къошулуп, энчи программа да жарашдыргъанды. Анга уа аш-азыкъны, кийимлени юлешиу, хакъсыз чач къыркъыу эмда быстыр тигиу дегенча эм башха жумушла киредиле. Уллайгъанлагъа не керек болгъанын билир муратда комплекс арада Ачыкъ эшиклени кюнлери бардырыладыла. Жыл сайын октябрьде жандауурлукъ халда бери сексен жылдан атлагъанланы аладыла – битеу да  отуз адамны. Ала мында солуйдула, кеслерине бакъдырадыла.

Районну бу социал учреждениясында уллайгъанлагъа кибик, сакъатлагъа, кёп сабийли эмда къолайсыз юйюрлеге да болушлукъ тапдырадыла. Аланы жумушларын юйлерине барып да тамамлайдыла.  Аны хайырындан къыйын жашау болумгъа тюшген адамла, бютюнда къартла, жангызлыкъ сынамайдыла. Быйылны тогъуз айында окъуна  социал ишчиле 313 адамгъа юйлерине барып, юй жумушларын тамамлагъандыла, медицина эмда социал болушлукъ этгендиле.

Арада терк социал болушлукъ берген бёлюм да ишлейди. Ол а жылны башындан бери 600-ден аслам адамгъа эс тапдыргъанды. Жандауурлукъ эте билген адамланы эмда учрежденияда ишлегенлени хайырындан кёплеге аш-азыкъ хуржунла, юс эмда аякъ кийимле, башха бек керекли затла да алынып, юлешиннгенди.

Кюндюз солуп, бакъдырып кетерча бёлюмде да быйыл 180 адамны жумушу тындырылгъанды. Алагъа юч кере ашатырча, саулукъландырырча, эрикмей турурча да онгла къуралгъандыла.  Социал службаны бёлюмюнде да 3404 адамгъа льготалы багъала бла кийимле тикгендиле, парикмахер жумушла тамамланнгандыла.

Айхай да, айтылып келген кёрюмдюле жылны ахырына дери  тюрленмей къаллыкъ тюйюлдюле. Анга уа «Жандауурлукъ» айлыкъ да себеплик этерикди. Социал араны таматасы Этезланы Мажит, учреждениягъа келип солугъан эмда жумушларын тындыргъан адамланы, районну битеу абаданларын да байрам бла алгъышлай, ала социал ишчиледен не заманда да болушлукъ, себеплик, ангылаулукъ табарыкъларына ышандыргъанды.