Сейирсиндирме сёзлюк(баргъаны) Чабыр - тау жерледе бек аламат жарагъан, таулуну алышындырыусуз да, жараулу да аякъ кийим. Чагъыркёз - алакёз (мал, ат). Чагьыу - кесекле тийип, къызгъанда, не бир башха жарашмагъан ийисден, ашдан териси бузулуп, анда чыкъгъан жарачыкъла. Чакъан - аулакъ, къамиш бёрю. Шакал. Чарыкъ - ийлеую жетишген тууар териден бичилип, иничке тикгич бла гымых тигилген аякъ кийим. Чакъ - заманны бир кезиучюгю, бир такъыйкъасы. Чакъгъан - адамны, асламысында сабийни эти, бети чагъып, къотурла болгъан ауруу; жюнню жумушатыр ючюн, таякъчыкъ бла ёрге силкиу. Чакъгъыч - къууну къабындырыучу керек. Чалтыр - къартайгъан базыкъ терекледе болуучу тешик. Дупло. Чалыу - иничке , базыкъ ийирилген халыладан, бауладан, окъа жипледен чалынып эшилген бау, тартма. Чапчакъ - чыккырны сау агъачдан ичи къазылып этилген тюрлюсю. Чапыргъан, тюй ургъан - сабийни эти чийленип, къызарып, къызыуланса неда башха ауруудан чыкъгъан къызыл-ала хыппилчикле. Сыпь. Чара - агъачдан ишленнген сай табакъ. Чарабет - кемсиз уллубет адам. Чардар - хырыкланы тутарча, чигинжилени юслери бла кёнделен салыннган агъач. Чарлау - телисине къызып къалыу. Бурунуна женгил жетип, айтырыгъын, айтмазлыгъын да оюм этмей къуюп къоюу. Чауул - ташлы жер; таш эгур. Чачлы - юй иеси. Домовой. Че - терк бол, ашыкъ, къымылда, мычымай жет. Чегим - терсге, тюзге кесамат этмеклик, багьа бичмеклик. Чемер – къолгъа, иш алса да, аны тынгылы этген, дайым айтхан сёзюне табылгъан, ишине сакъ адам. Черен - салам тиш. Чериу - жыйырма атлыдан къуралгъан сауутланнган аскер. Чериуан - жюз атлыдан къуралгьан аскер. Чет - тыш жер, тыш къырал, узакъ жаны. Чекден тышында къырал. Четне - сабийни, къызыула тийип, юсю азчыкъ чапырып, жётелчик да этип ауругъаны. Чертлеу - бир затны айыртып, чертип айтыу. Чечен - сёзге уста; не тюрлю кезиуде да, хазыр этип тургъанча, сёзню, чамны келишдирип айтып къоялгъан. Чёпюре - балауузну эритип, сыкъгъандан сора къалгъаны, къышхыры. Чийбыдыр - хомух, хыра, эринчек адам. Чилле - жумушакъ сыйлы халы, къумач; жайны бек къызыу, къышны бек сууукъ кезиулери. Ол заман къыркъ кюн болады. Жай чилле - никкола (июнь) айны экинчи жарымында башланып, хычауманны (августну) ал кюнлеринде бошалады; къыш чилле - башил (январь) айны экинчи жарымында кирип, Тотурну ал айыны (март) ал кюнлеринде чыгъады. Чимдиу - ачыкъ айтмай, къагъып, «жаз тил» бла биреуню тасхасын, шарайыбын ачаргъа кюрешиу. Чир - мажал. Игини, игирекни тенглешдирип айтханда жюрюйдю. Чирги - алгъын заманлада жабагьыдан этилген жатхан жер. Чокурай - агъач челекни эки къулагъына аны сабын бегитген чюйчюкледен бири. Чоллакъ - чепкен сокъгъан керек. Чомуртха - адамны аркъа сюегини ахыры. Копчик. Чонг - тюрк тилледе - уллу тамата, сыйлы. Чопал - башлыкъны башлыгъына салыныучу базыкъ тюйме. Тухтуй. Чоппахарс - оздуруп махтау, биреуню асыры кётюрюп, тёгерегине къарс къагъыу; мажюсю тейрилеге, Чоппагъа жалбарыу Чохас - олтанларына баула тагъылып, бутларына ала бла байлап кийиучю женгил аякъ кийим. Сандалла. Чуба - ууакъ къангачыкъланы сыйдам этип, бир бирлерине баула бла тизип, къызланы ёшюнлерин къысдыргъан керек. Чубар - бийлик белги. Палица. Белгили адамны сайлама къумалы аты. Бирде тюрсюн магъанада да айтылады. Чулмак - бир къойдан къыркъылгъан жюнню тобу. Чулхурум - маллагъа туз ата кетип, «чыгыр» этилген жер. Аллай жерлеге кырдык чыкъмай къалады. «Тузну кырдык юсюне атмай, чулхурум жерчиклеге атаргъа кюреш не бир таш юсюне-зат!», - деп, таматала жаш-къушланы кырдыкны аяргъа юйретиучюдюле. Чунгку - жангы жаугъа этилген бушто. Чура - къанатлыны жуху, ауузу. Клюв. Чууана - къая жютюле. Мажюсюлюкде - тобалыкъ этген жер. Святилище, алтарь. Чуукырдык - къаты сабакълы татымлы кырдык. Чык - бёлюм, бууун, тюйюм; адамны баш эркинлигине чек салыу. Чыкъен - жыялы агъач ушкок. Арбалет. Чыл - бозаны баш къаймагъы. Сюленни къайнатып, сууу кетгенден сора къалгъан кагы, къалыны. Чымчыракъ - таза, къатышсыз, ариу. Нежный, прозрачный. Чымылды - къапчыкъны тюбюне жабышып къалгъан ун жугъу; къазанны къырымдысы. Чырмылтын - къыйын ишден, ауур кётюрюуден чыкъ1ъан быгъын ауруу. Грыжа. Чюгюрме - адамны этинде, чархында териси кетип, ашланнган ауруу. Чюйке - юсюне халы чёргелип, чоллакъны ичинде жюрюучю керек. Чюйрекъылыкъ - ишни тюзюн кёре тургъанлай, терсине буруучу. Шагъбан (Шагьабан)- арап орузламада ай ат. Шёндюгю астрономия ай санауну январындан 22 январындан 12 декабрине дери. Шам - кюнчыгъыш. Шёндюгю тилде аламат жер, аламат халкъ, аламат тукъум. Шамшия, шемшия - адамла, бегирекда тиширыула, жауундан, кюнден ' сакъланыр ючюн жюрютген къол харекет. Зонт Шанкурт - агъачны ичи къазылып этилген айран гыбытны бухчагъына салыучу чюй быргъычыкъ. Шапийги - фарс къауум, масхапчы фарсит-ислам партияны ниетлерин жайыучу адам. Пропагандист Шат - жарыкълыкъ, жюрек ачыкълыкъ. Шат сууу - къууанчлыкъны череги. Шатагет - гыйы ташладан къаланнган хуна. Шатал - уучула биргелерине жюрютюучю къол беччан - бирге чалишдирилген юч къазыкъ; жерге орнатып, юсюне ушкокну салып атарча къош. Шатгийка - жекбаш, серилме къыз. Шауай - атла сатыучу. Шауел - къатхан къарны юсюнде жылтырагъан инжиле. Шаулух, шатан - къумалы мал, ат. Шафауат - игилик этиу; гюняхларын кечерге болушуу. Жандауурлукъ. Шахмаран - жилянла патчахы. Шахтаран - къарын ауруугъа жарагъан дарман кырдык. Андан этилген дарман бек жарайды. Ёпкелери ауругъанлагъа да шахтаран сылты ичиредиле. Шауешик - эмен къауумдан къаты агъачны бир гюрлюсю. Шауракъ - къарачайлылада жюрюйдю, кюн жайылгъан булутла арасындан тама, бирде шулпу эте, бирде уруп ёте, тама, гяхиник ёсдюрген жаз жауун; кёксюл тюрсюнлю, ууакъ жипли жибек, дарий. Шаушалгъан - сюзюлген; адам эсе, къарыуу кетип жатхан. Шежире - ханлыкъда, къыраллыкъда кюн-кюннгю ишле юзюлмей жазылып туруучу дефтер. Тарых документ. Летопись. Шейит - дин ючюн къазауатха кирип ёлген; дини ючюн кесини жашауун къурман этген. Шекил - адамны кёзге кёрюнмеген жазыу нёгери; аны тюзюне, терсине къатышып, бирде жоюлурдан сакълагъан, бирде урунмаз жерине урундургъан жашыртын кюч. Рок. Шеши - жауурун къалакъны артында сырт сюеги. Шин - адамны бет тюрсюню, бет къаны, сыфаты. Сары шинли, къара шинли, акъ шинли. Ширин - татлы, бек татлы. Шкырна - ариу жарылгъан бутакъсыз къанга. Нарат. Тюз, субай, ариу ёсген агъач. Шодурайгы - санлары тюшген, мудах. кёлсюз болгъан; ач болуп, ёнгю кетген. Шонтай жары - терн хуржунчукъ, бохча. Ашыкъ къапчыкъ. Тютюнчюле аллай жары шонтайчыкъ бла тютюн жюрютюучюдюле; уучула уа - ушкок от. Шортман - къайгъысыз, урушсуз заман ючюн кёк тейрисине этилиучю табу. Мажюсю заманны ырым тилеклеринден бири. Аллай заманны белгилеген къууанч тепсеу. Шошкъап - юрмей, ызынгдан шош келип къапхан ит. Аллай тенгле да бардыла - кёзюнге ариу айтып, ызынгдан къара сабан сюрген. Шубха - бир затха ишекли болуу. Кёлюне келгеннге, ишекли болгъанына ахыр-ауал ийнанып да къалмай. экили болмакълыкъ. Шукур - Аллахха табу салыу; жашагъан жашауу ючюн ыразылыкъ бериу. Благодарение. Шулпу - азчыкъ себелеген жылы ууакъ жауун. Шууаккы - бутакъсыз ариу чыбыкъ; бийик ёсген тал, чертлеуюк. Шылаплыкъ - алашалыкъ. госталыкъ. Шындык - къалын ёсюп, ичи бла адам жырып ёталмагъан ханс, кырдык; эмина не башха ауруу жайылып, ёлет кирип, кёп адам къырылгъаны. Шырдан - сыйлы адам. Святой. Шырчаппа - тизгинсиз адам. Шхайты - эски эл, эски журт.
Поделиться:
Читать также:
19.04.2024 - 12:45 →
Огъурлулукъгъа ийнаныуну тас этмей
17.04.2024 - 14:39 →
Ара межгит – ариу жерлерибизден бири
16.04.2024 - 09:26 →
«Ишим халкъгъа хайыр келтирсе сюеме»
15.04.2024 - 10:22 →
«Чепкенлерибизни жаратханла кёп болуп, аланы терк сатып алгъандыла»
09.04.2024 - 10:00 →
Аны жашауун сахна жарыта эди
|