Жыл саны-аз, билими, сынамы, усталыгъы уа –аслам

Миллетибизде, медицинаны жолу бла барып, адамланы саулукъларын игилендирирге, бирде уа  жашауларын окъуна къутхарыргъа къолларындан келгенни аямагъанлары бла бирге тамамлагъан жумушларын илму бла байлагъанларыбыз да асламдыла. Аладан бири уа  Хасауланы Русланды.

Бюгюнлюкде Нальчикде Къан тамырла арада хирург  болуп ишлеген жаш, Биринчи Чегемни биринчи номерли  школун жетишимли  тауусуп, врачха окъур акъылда Тверьде медицина академиягъа (шёндю университет) кирген эди. Эм алгъа ол жаякъ сюекле-бет хирургияны сайлар умут этгенди.

Алай эсе да, адамны жашауунда  бир тюрлю болум къайсы болса да затха башха кёзден къаратып да къояды. Руслан да тёртюнчю курсну кезиуюнде къан тамырланы хирургиясы предметни окъугъанларында, ма  бу жолну аныкъы болгъанын ангылагъанды.

Алай а сагъынылгъан дисциплина анга эм алгъа тынч берилип  къалмагъанын да жашырмайды. Андан а аланы медицина илмуланы кандидаты Максим Страхов окъутханды. Ол предметни иги билгенин, студентледен да къаты сурагъанын чертеди ушакъ нёгерим. Преподаватели бла бирге дежурстволагъа да жюрюй, сагъынылгъан шахарда биринчи кере къан тамырлагъа операция къалай  этилгенин кёрген студент кеси да  ма  аллай жумушну бардырлыгъын ол заманда айтханнга, айхай да, ийнаналлыкъ тюйюл эди.

Ординатураны уа Хасау улу Къобанны медицина  университетини кардиология каефдрасында жюрек-къан тамырла хирургиядан ётгенди. Бу бёлюм бла шагъырейликлери терен болгъанла биледиле сагъынылагъан кафедрагъа таматалыкъны  Юг  федерал округну баш кардиохирургу Кирилл Барбухатти этгенин.

Анда билимин да ёсдюре, Руслан Краснодар крайны профессор Очаков атлы краевой клиникалы  больницасында къан тамырланы хирургиясы бёлюмюнде сынам ала, аслам затха тюшюннгенди. Мында сагъынылгъан регионну бу бёлюмюнде баш врачы Роман Виноградовну бла операцияла бардыргъан хирург Султан Бутаевни къолунда  юйреннгенине ыразыды.  «Тверь - ол медицина ангыламлагъа тюшюннген жерим эсе, Краснодарны больницасында уа бюгюнлюкде билгеними 85 процентине юйреннгенме. Анда жаш адамлагъа да кеслерин кёргюзтюрге, сынаргъа онг бередиле»,-дейди.

Кертиди, медицина операцияланы этиуню юсюнден айтсакъ, отуз жылында хар ким да профессионал болуп къалалмайды. Ушакъ нёгерим а Краснодарда илму жаны бла мурдорну кючлюлюгюн белгилейди. Анда ишлеген, аны тюшюндюрген къайсы бирине да ыспас этеди. Хар кюнден кеси ючюшер операция бардыргъанын,  саулайда больницада уа аланы юч жюз чакълысы озгъанын айтады.

Бери, туугъан журтуна уа белгили врачыбыз Ботталаны Хадисни чакъырыууу бла къайтхан эди. Бусагъатда ол этген атламына сокъуранмайды. Аны тыш жерлеге да кёпле чакъырадыла, алай ол кесини билимин  мында хайырланыргъа итинеди.

Хасау улу алыкъа жаш эсе  да,  сынамлы хирургга саналады. Аны юсюнден бизге белгили реаниматолог-анестезиолог Геккиланы Жаннет былай дегенди: «Аныча жыл санда операцияланы кеслери алларына этгенле бек аздыла. Русланнга ол усталыкъ къудуретден берилгенди. Анга пациентге къараргъа тюшсе, ол мыйысы  бла сагъышланнгынчы окъуна, къоллары нени  къалай этеригин билип къоядыла».

2017 жылда уа таулу  жаш алыкъа  республикада  биринчи кере  бардырылгъан операцияны этгенди. Саусуз а эки тюрлю инсультха къоркъуу бла (ишемиялы эмда геморрагиялы) тюшген эди. Башхача айтханда, аны башында эмда боюнунда къан тамырларына да бир кезиуде хирургла болушлукъ этерге керек эдиле.  Хасау улу боюн бла байламлы жумушну тамамлагъанды. Бирсисин а, Къан тамырланы арасына келип, сынамына башхаланы да тюшюндюрген Виктор Александрович Лукъянчиков (Склифосовский атлы НИИ-ни нейрохирургия бёлюмюню таматасы) бардыргъанды.

Бюгюнлюкде «Профилактика ишемических поражений головного мозга (оперативное лечение)» деген темагъа диссертацияны хазырлагъанды. Илму бла сюйюп кюреше, кесини пациентле бла байламлы ишинде тюбеген затларын, тенглешдириулерин барысын да жыйышдырып, бирсиле да аны сынамын хайырланырларын излейди. Баям, илмуну къыйматы да андады-тамамлагъан жумушунг жамауатха эс тапдыргъанында.

Жаш хирург алыкъа уллу жетишимле болдурмагъан эсе да, кёплеге болуша келеди. Медицинаны сайлагъанла, айхай да, хурметге тийишлидиле. Руслан да, тенглерича, спортну, жолоучулукъну да сюеди. Алай а солургъа ашыкъгъанладан, къызыннганладан тюйюлдю.

Отпускун а  ол Краснодарда сагъынылгъан больницада оздуруучуду. Алай бла  уа  къайсы жаны бла да толу сынам жыйышдырады. Аны иш кёллюлюгюн, биз аны бла тюбешген кезиуде да ненча адамгъа эм къалай консультация бергенине кёре, хирург жашыбыз операциялары, илму ишлери бла да мындан арысында да юлгюлей къалырына ийнанабыз. Бюгюнлюкде аны республикада таный эселе, эм багъалы затларын- саулукъларын – анга ышана эселе, ол а тамата коллегалары, адамла да аны чынтты профессионалгъа санагъанларыны белгисиди.