Закий акъсакъалны 1940 жылда къуралгъан поэзия ингири

Мечиланы Кязим  миллетибизни хар  инсанына энчиди, сыйлыды.  Жарсыугъа, аны таныгъанла, аны юсюнден хапарларгъа боллукъла жашаудан кетип барадыла.  Аны себепли акъылманны юсюнден аны кёргенлени айтханлары бек къыйматлыды. Аллай бир шартны юсюнден бизге Миллет библиотеканы къуллукъчусу Махийланы Азиза белгили этгенди.

«Социалист Къабарты-Малкъар» газетде 1940 жылны 14 июнюнда (сексен жыл чакълы бир мындан алгъа) былай жазылгъанды: «Шыкъы элде, анда туугъанды эм жашайды  КъМАССР-ни искусстволарыны сыйлы къуллукъчусу, Къабарты-Малкъарны халкъ жырчысы Мечиланы Кязимни 6 июньда адабият ингири къуралгъанды. Кеслерини акъылманларына  тынгыларгъа эл клубха  аслам халкъ жыйылгъанды. Аланы араларында акъсакъалны тенгшилери, токъсанжыллыкъ  поэтни  жаш заманында шуёхлары, журтдан жаш адамла, устазла, партиячыла, совет эм халкъ мюлк иеликни башчылары болгъандыла.

Ингирни эл советни председатели  жолдаш Шауаланы Акаш ачханды.  Мечи улуну чыгъармачылыгъыны юсюнден жолдашла Столяров эм Къулий улу сёлешгендиле.  Кязим а жыйылгъанлагъа  адабият ишини юсюнден кеси тынгылы  хапарлагъанды.

- Жырла тагъып мен элли жыл чакълы бир мындан алгъа башлагъанма, - дегенди ол. Ол заманда мен аланы сапариш бла хазырлай эдим.  Манга  кеси, башха элледен да адамла келгендиле, къууанчларыны неда жарсыуларыны юсюнден  жыр эт деп тилегендиле.  Къурагъанма. Аланы тойлада, бушуулада да айтадыла…

Мечи улу элли жыл мындан алгъа жазылгъан, бусагъатда да халкъ ауузунда жюрюген «Къызны тарыгъыуу» деген чыгъармасы къалай жаратылгъаныны юсюнден да билдиргенди.

- Бир жол манга бир тиширыу келген эди. Ол къыйын, жарыкъсыз жашаууна тарыкъгъанды. Аны  къарт, къылыгъы осал бай кишиге эрге бергендиле. Ол кеси уа жарлы юйюрден эди, кесича бир къолайсыз, алай ётгюр жашны сюйюп болгъанды.  Алай ата-анасы, ол замандагъы жорукълагъа бойсунуп,  сюймегенине берип, жаш жашауну сындыргъандыла.

- Ол аны юсюнден манга  айтханында,- деп эсгереди  акъсакъал Кязим, - аны бетин ачы жилямукъла жуугъандыла. Ол тиширыуну биргесине  мен да жилягъанма, артда уа сиз барыгъыз да билген жырны такъгъанма.

Ызы бла ол чыгъармасын эшитдиргенди. Кёп акъыллы сёз айтханды  ол тюбешиуде Мечиланы Кязим. Ол халкъ аллында  чыгъармачылыгъы бла байламлы жюрегинде болгъанны жашырмагъанды.

Аны насийхат сёзлерине, жангы назмуларына тынгылагъандан сора, жырларын  колхозчу Солтанланы Жарахмат жырлагъанды, Къулийланы Къайсын окъугъанды. Мечи улуну тизгинлерин  орус тилге кесини кёчюрмелерин  жолдаш Столяров эшитдиргенди (эсгертейим, бу жазылгъан билдириу хапарны автору да олду)».