Жаш алимлеге жангы жол

Бу кюнледе Х.М. Бербеков атлы Къабарты-Малкъар къырал университетде Россейни  жаш алимлерини онунчу форуму къууанчлы халда ачылгъанды. Къураучуланы муратлары – Россейни Жаш алимлерини союзу (КъМР-ни регион бёлюмю) бла КъМКъУ – форумну «Жаш инноваторланы школу» деген халда бардырыргъа эди.

Шимал-Кавказ бла Юг федерал округладан, Москвадан эм къыралны башха регионларындан жюзден артыкъ студент, магистрант эм аспирант семинарлагъа, сынам дерслеге, мастер-класслагъа къатышхандыла. Алада Россейни Билим бериу эм илму министерствосу, Сколково фонд, инновациялагъа себеплик этген фонд, Миллет технология башламчылыкъланы, стратегиялы тинтиулени агентствосу къурагъан къауум конкурслагъа къатышыуну юсюнден болгъанды форумну баш темасы.

Жаш алимлеге халкъла арасында патент жюрютюуню энчиликлерини юсюнден толу ангылатхандыла.  Ала энди «Илму» миллет проектге эмда башха илму-техника проектлеге да къатышырыкъдыла. Андан тышындан а аланы ишлерине техника-экономика жаны бла энчиликлеринден инструктаж этгендиле. Сагъынылгъан министерствону бла фондланы экспертлери жаш алимлеге спикерле бла менторла болгъандыла.

КъМКъУ-ну ректору Юрий Альтудов жаш алимлени форумну ачылыуу бла алгъышлагъанды эмда ала усталыкъларын кётюрюрча, жарашдырылгъан проектлери грант конкурслада хорламгъа тийишли болурларын тежегенди.

«Быллай жумушла байламлыкъланы кенгертирге, жангы адамла бла, ол санда дунияда атлары айтылгъан алимле бла да танышырча онгла бередиле. Ол а тийишли болумду. Барыгъыз да бир ишни бардырасыз – къыралыбызны илмусуну айныууна къошумчулукъ этесиз. Келир заманны жигитлери сиз боллукъсуз деп толу ийнанама», - дегенди ректор.

КъМКъУ-ну илму ишле жаны бла проректору, Россейни Жаш алимлерини союзуну председателини орунбасары, сагъынылгъан союзну республикабызда регион бёлюмюню башчысы Светлана Хаширова айтханнга кёре, проект илмуну хар тюрлюсюн да ачыкълагъанды, аны къурагъанла къолдан келгенлерин аямай, бу болум жаш алимлеге хайырлы болурча этерге кюрешгендиле.

КъМР-ни жарыкъландырыу, илму эм жаш тёлюню ишлери жаны бла министри Ауес Кумыков бла сагъынылгъан министерствону комитетини башчысы, Парламентибизни депутаты Нина Емузова форумгъа къатышханланы алгъышлагъандыла эмда республикабызны эм ариу жеринде – Элбрус тийресинде - бардыргъан  ишлери бла солуу кезиулерин тамам бирлешдирип, заманларын ётдюрюрлерин тежегендиле. Дагъыда бу магъаналы жумушну къурагъанланы бла анга къатышханланы МГУ-ну таматаларыны атындан, анда социология бёлюмюню доценти, социология илмуланы кандидаты Нина Малиева алгъышлагъанды. Форумну сынам кесеги КъМКъУ-ну Элбрусдагъы окъутуу-илму базасында ётерикди.