Нальчикде жылыу бериу кезиу башланнганды

Республиканы ара шахарында юйлеге жылыу бериу кезиу 21 октябрьде башланнганды, деп билдиргендиле муниципалитетни пресс-службасындан. Анда айтханларына кёре, социал сферада объектлеге уа жылыу 14 октябрьде окъуна жиберилип тебиреген эди.
Тийишли жорукълада белгиленнгенича, юйлени жылыу бла жалчытып башларча  беш кюнню ичинде хауаны орталыкъ жылыулугъу сегиз градусдан артыкъ болмазгъа керекди. Шёндю уа алай да болмагъанлыкъгъа, аслам адам сёлешип тургъанын эмда отоулада да артыкъ жылы болмагъанын эсге алып, бу кезиуню алгъаракъ башларгъа оноу этилгенди, дегендиле мэрияда.