Къуллугъун артыгъы бла хайырланнганына ишеклик барды

Газ службаны келечиси, кесини полномочияларын артыгъы бла хайырланып, Бахсан районда жашагъанлагъа газны хайырланнганлары ючюн терс шартланы кёргюзтюп, 1,1 миллион сом къоранч этгенине ишеклик барды. 

Аны районну полициячылары  тинтиу жумушла толтургъан кезиуде ачыкълагъандыла. Белгили болгъаныча, былтыр сентябрьде 38-жыллыкъ эр киши, инсанланы жумушларын тамамлау жаны бла мастерни къуллугъунда ишлей, отчётла хазырлагъанда, инсанла хайырланнган газны ёлчемин семиртип кёргюзтгенди.  Алай бла аны шартларына кёре, газ службаны жумушлары бла хайырланнган 38 адамгъа 1, 169 минг сомну артыгъы бла жазылгъанды. 

Эр кишиге РФ-ни УК-сыны 201-чи статьясыны 1-чи кесегине кёре уголовный иш ачылгъанды. Ол къуллугъун артыгъы бла хайырланнганы ючюн терсленеди. Быллай аманлыкъны этгенни эркинлиги тёрт жылгъа сыйырылыргъа боллукъду. 

Даулашып, тюйюш ачхандыла
РФ-ни Следствие комитетини КъМР-де следствие управлениясы РФ-ни УК-сыны 109-чу статьясыны 1-чи кесегине кёре (билмей, адамны ёлтюргени ючюн) уголовный иш ачханды.

Быйыл 18 октябрьде 19 сагъатда РФ-ни МВД-сыны Краснодарда университетини Нальчикде бёлюмюню квалификацияны ёсдюрюу жаны бла Шимал-Кавказ институтунда окъугъанла даулашып, тюйюш ачхандыла. Аны кезиуюнде биреулен алгъан жараладан алайда окъуна ауушханды. 

Бюгюнлюкде тюйюшге къатышханла барысы да тохташдырылгъандыла, следствие аланы барысыны да ишлерине право жаны бла багъа берликди. Тинтиулени чеклеринде сюд экспертизала бардырыллыкъдыла.
Бу ишни тинтиу контрольгъа алыннганды. 

Наркотиклени кесине асырагъанды
Излеу-оператив жумушланы кезиуюнде КъМР-де МВД-ны уголовный розыскыны келечилери, наркополициячыла эмда Чегем районда ОМВД-ны патруль-пост службасыны полициячылары бла бирге Шалушкада «Лада Приора» машинаны тохтатхандыла. 

Аны тинтген кезиуде право низамны сакълаучула ичинде сары суусун заты бла юч шприц эмда эки артмакъны тапхандыла. Машинаны 34-жыллыкъ водители, ол а алгъыш да сюдню оноуу бла жууапха тартылгъанды,  ангылатханыча, шприцледе эмда артмакълада «героин» наркотикди, ол аны кесине ичерге асырагъанды. 
Экспертиза ууну ауурлугъу 2,97 граммгъа жетгенин тохташдыргъанды. Эр кишиге уголовный иш ачылгъанды.