Кёл салып окъугъаннга, билим алыргъа итиннгеннге бир чырмау да жокъду

Глашланы Николайны жашы Исмайыл жай каникуллада солуп, къолундан келгенича анасына болушуп, бу кюнледе окъуууна къайтханды. Жаш Саратовда Василий Разумовский атлы къырал медицина университетде билим алады.

Бу вуз къыралда бек эрттегиледен бириди. Ол  1909 жылда Николай патчахны буйругъу бла къуралгъанды. Ол заманда аны жаланда бир факультети бар эди, энди уа вузну 32 корпусу ишлейди. «Ол саулай шахарды – больницалары, окъуу мекямлары бла да. Бу вузну   9 классда окъугъанымда сайлагъанма. Ол кезиуде атам бек ауругъан эди. Мен иги окъуп, билим алып, аны сау этерге  бек сюе эдим, алай бу муратыма жеталмадым, жаннетли болсун»,-дейди  Исмайыл.

2014 жылда уа   «Эксперт РА» агентство Саратовну къырал университетин СНГ-ны къыралларыны бек иги вузларыны тизмесине къошханды эмда анга «Е» классификация берилгенди. Ол а бу окъуу юйню выпускниклерини билимлери бийик даражада болгъанын кёргюзтеди.

Сёзсюз, быллай жетишимле болдурур ючюн а, абитуриентлеге да уллу излемле салынадыла. Исмайыл да, битеу билимин аямай,  окъуугъа хазырланнганды, алай,   биринчи жыл Бир къырал экзаменде алгъан баллары жетмей,  киралмай къалады.

Болсада жаш, тюнгюлмей, андан да бек къарыу салып хазырланады эмда экинчи жыл, муратын толтуруп, медицина университетни студенти болады. «Кертиси бла да анда бек иги билим бередиле, устазлары да сынаулудула, излемле да къатыдыла. Башха жерледе окъугъан тенглеримден ала экзаменлерин улутха берип  салдыргъанларын эшите туруучума, алай бизни вузда уа ол ахырда жюрюмейди. Кёл салып окъугъаннга, билим алыргъа итиннгеннге бир чырмау да жокъду. Дагъыда бирле кавказлыланы къоймайдыла, къысыулукъ этедиле дейдиле да, мен аны ахырда сынамагъанма. Кесинги ариу жюрютсенг, жорукъланы бузмасанг, борчунгу кереклисича толтурсанг, санга бир адам тыйгъыч саллыкъ тюйюлдю»,-дейди ол.

Исмайыл окъууну бошагъандан сора ординатурагъа кирирге, билимин андан ары ёсдюрюрге сюеди, кеси да  кардиология неда неврология усталыкъладан бирин сайларыкъды. «Кертисин айтханда, врач ол сейир, ариу, адамлагъа керекли усталыкъды, алагъа халкъда хурмет, сюймеклик да уллуду. Алай  школну бошагъандан сора уа жюрегинг тартхан, фахмунг болгъан усталыкъны сайларгъа керек сунама. Курсубузда атам къоймай киргенме, анам врачды да, мени да аны ючюн келтиргендиле бери,  кесим а экономист, артист, тигиучю, юрист  болургъа сюе эдим дегенле бар эдиле. Алай аладан кёплери биринчи курсну да бошаялмай кетгендиле.  Кесинги аллынга мурат салмай, ким болургъа сюйгенинги ангыламай, къайры болса да кирип къалыргъа жарамайды, мен акъыл этгенден, артда сен къаллай специалист боллукъса?»-дейди жаш. 

Глашланы улан илму бла кюреширге, окъууну бошагъандан сора онг болса Саратовда ишлеп, сынау жыйышдырыргъа умут этеди. «Алай мен артда республикагъа къайтып, мында миллетиме, халкъгъа жараргъа сюеме»,-дейди ол.