Миллет политиканы къыйматлы къурауну амалларын сюзгендиле

Къабарты-Малкъар къырал университетде «РФ-ни субъектлеринде къырал миллет политиканы бардырыу» деген билдириу  семинар болгъанды.   Анга Шимал Кавказ федерал  округдан   къырал, регион  эм муниципал  власть органланы, жамауат организацияланы  келечилери, саулайда 150- ге жууукъ специалист  къатышханды. 

- Бюгюнлюкде  Россейни 85 регионунда 195  миллет жашайды. Глобализацияны кезиуюнде аланы бирикдириу бек магъаналы ишледен бириди.  Динлени  бла миллетлени арасында  ангылаусузлукъла болмазча   муниципал ишчиле, граждан обществону  институтлары эм  журналистле да тири  кюреширге керекдиле. Аланы билимлерин ёсдюрюр ючюн а   былтыр Миллетлени ишлери жаны бла федерал агентство (ФАДН)  Москваны къырал университети (МГУ) бла бирге  субъектледе миллет политикадан  билдириу семинарла бардырады,-дегенди  МГУ-ну къырал управления факультетини инновация проекле жаны бла арасыны таматасы Александр Воронов, проектни юсюнден  хапарлай.   

Проектни  магъаналыгъыны юсюнден   МГУ-ну къырал управление жаны бла кафедрасыны  деканыны, Къырал думада жарыкъландырыу эм илму жаны бла комитетини таматасы Вячеслав Никонов бла  миллетлени ишлери жаны агентствону тамасы Игорь Баринов да кеслерини  письмоларында  билдиргендиле.   

Тюбешиуде КъМР-ни граждан обществону институтлары  бла байламлыкъ къурау эмда миллетлени ишлери жаны бла министри Анзор Курашинов да проект  СКФО-да къыйматлы   миллет политиканы къураугъа   ахшы себеплик этерине ышаннганын айтханды.     Вузгъа  хазырлау жаны бла проректор  Артур Кажаров а  бюгюнлюкде   КъМКъУ-да  40 къыралдан 70-ден аслам  миллетни келечиси окъугъанларын,  арада ангылаулукъ сакъланырча, шуёхлукъ айнырча ала  эрттеден бери тири ишлегенлерин да билдиргенди.   

Быйыл миллет политика жаны бла семинар Москва, Псков, Чебоксары, Тюмень, Якутск, Омск эм Нальчик шахарлада  ётгенди. Жууукъ заманда аны Волгоградда да сакълайдыла. Проектни чеклеринде  Россейде   1200 чакълы къырал эм муниципал къуллукъчуланы билимлерин ёсдюрюр мурат барды.
Семинарны ахырында анга къатышханлагъа  МГУ-ну атындан   шагъатлыкъ къагъытла да  берилгендиле.