Сейир кёрмючле, таныш макъамла, солдат как да

Нальчикде,Къабарты-Малкъар къырал аграр университетни тийресинде, Росгвардияны «Къоркъуусуз шахар» деген фестивалыны регион кезиую ётгенди. Анга республиканы ара шахарында болгъан юч вузну студентлери, школчула, Битеуроссей халкъ фронтну активистлери, Атажукино элде кадет школну сохталары, жамауат да къатышханды.

Алагъа ыразылыгъын билдире, Росгвардияны Къабарты-Малкъар Республикада Управлениясыны таматасыны орунбасары Заурбек Хачемизов мында хар ким да сейир шарт табарыкъды, миллет гвардияны аскерлерини юсюнден кёбюрек билликди, бирлеге уа  усталыкъ сайларгъа да болушурукъду,дегенди.

Къонакъла кинологланы, сапёрланы, адамсыз учхан аппаратланы операторларыны, улоу-транспорт ротаны аскерчилерини ишлери бла шагъырейленнгендиле, энчи техниканы, сауутланы, аскер кийимлени кёрмючюне къарагъандыла.  Росгвардияны офицерлери контракт бла аскерге бла окъуугъа къалай тюшерге, объектлени сакълау жаны бла къаллай жумушла тамамланнганларын да билдиргендиле. «Эльбрус» СОБР-ну медицина службасыны специалистлери ачыгъаннга биринчи болушлукъ этерге, жараны байларгъа, башха амаллагъа да юйретгендиле.

Фестивальгъа келгенле «Росгвардия – объективде» деген сурат кёрмючге да  уллу эс бургъандыла. Аны Къабарты-Малкъарны «Патриот» деген регион жамауат организациясы «Махтау.Россей.Хорлам!» деген жаш тёлю аскер-патриот марафонну чеклеринде къурагъанды.

Звёздныйде аскер бёлюмню духовой оркестрини музыкантлары, Атажукинону кадетлери да жырлары,тепсеулери, макъамлары бла да къонакъланы къууандыргъандыла. Аскер поварла уа келгенлени  солдат как эмда чай бла сыйлагъандыла.  

Юсюпланы Галина.
Поделиться: