Къашхатауну кюнюн къууанчлы белгилегендиле

   Ол кюн жылны ичинде бийик кёрюмдюле болдурулгъан спортсменлени  алгъышлау да ахшы тёреге айланнганды. Бу жол была белгиленнгендиле: Жемталадан Артур Сокуров бел баулары бла тутушуудан Россейни чемпиону болгъанды, грек-рим тутушуудан спортну халкъла аралы устасыды.   Мурзабек  Мисостов  а зарагижчиди. Ол грек-рим тутушуудан Россейни биринчилигинде биринчи жерге тийишли болгъанды, СКФО-да да хорлам болдуруп, атын айтдыргъанды. Бел баула бла тутушууудан дунияны биринчилигинде да хорлагъанды. Волгоградда Олимпиадалы резервни училищесин жетишимли бошагъанды. 

  Эфендиланы Расул Къашхатауданды. Спортну устасыды.  Россейни бел баула бла тутушуудан чемпионатларында  саугъалагъа тийишли болгъанды. Эндрейланы Аслан бабугентчиди. Ол республикалы, битеуроссей эмда халкъла аралы эришиуледе  хорлап, атын айтдыргъанды. Дагъыда  Аслан  Россейни жаш тёлюсюню арасында  тутушуудан халкъла аралы эришиуледе да кёп кере жетишимле болдургъанды, Россейни кубогун да алгъанды. 

 Мокъаланы Расул  да спортну устасыды. Ол да бел баула бла тутушууда бир ненча кере жетишимли болгъанды. Быйыл Грозный шахарда бардырылгъан Кавказ оюнлада да хорлагъанды. Тюрк халкъланы араларында Кърымда бардырылгъан спартакиаданы саугъасына тийишли болгъанды.  Мокъаланы Муса да Россейни чемпионатларында бир ненча кере хорлап, атын айтдыргъанды.Ол да  Кърымда бардырылгъан  спартакиадада  хорлагъанды.

        Къууанчлы ингирде аламат концерт  да кёргюзтюлгенди. Аны Нальчикден келген эмда  районну Маданият юйюню артистлери къурагъандыла, деп билдиргендиле Черек районну администрациясыны пресс-службасындан.