Жетишимлилеге – сый, махтау, саугъала да

Жылны ахырында Хасанияны Маданият юйюнде бет жарыкълы  уруннган  эллилеге байрам къурау ахшы тёреге айланнганы. Быйыл да алай болгъанды. Озгъан байрым кюн ингирликде Маданият юйню уллу залында  адамла асыры кёпден, олтурур угъай да, сюелир жер окъуна жокъ эди. 
 Хасаниячыланы  келе тургъан жангы жыл бла алгъышларгъа элни администрациясыны башчысы Азаматланы Къайсын, КъМР-ни Муслийманларыны дин управлениясыны  таматасыны орунбасары Мисирланы Хызыр, КъМР-ни  курортла эм туризм министрини орунбасары  Суммайланы Ахмат, дагъыда башхала  келген эдиле. 
      Ол ингирде айырмалы врачла, устазла, юйретиучюле, спортсменле, дагъыда башхала  администрацияны сыйлы грамоталарына, саугъалагъа да тийишли болгъандыла. Аланы араларында Долинскде 8-чи номерли орта школну директору Ёлмезланы (Хочуланы) Зайнаф, устаз Жангоразланы Зоя, юйретиучю Атталаны Надя, спорт школну директору Ксаналаны Алим, сабий врач Сейтоблаева Элеонора  бар эдиле.
   Белгили артистле уа саугъаланнганланы, эллилени да  жырлары, тепсеулери бла кёллерин бютюн  кётюргендиле. Къараучула Мусукаланы Русланнга, Холамханланы Къайсыннга, Башийланы Магометге, Бёзюланы Солтаннга, Созайланы Натугъа, Атмырзаланы Эльдаргъа, Чабдарланы Алёнагъа, "Насып" тепсеу ансамбльге, дагъыда башхалагъа къызыу къарсла бла ыразылыкъларын билдиргендиле.