Архитектураны жашырынлыкъларындан хапарлы болгъандыла

Кёп болмай Къабарты-Малкъар къырал университетде Архитектураны кюнюн белгилегендиле. Анга архитектура, къурулуш эм дизайн  институтну  (ИАСиД) преподавательлери, студентлери эм башхала къатышхандыла.

Жыйылыуну ача, ИАСиД-ни таматасы Толя Хежев жыйылгъанланы  алгъышлап, байрамны  тарыхыны, ол санда бёлюмде союзланы, биригиулени да  къалай къуралгъанларыны юсюнден   хапарлагъанды.

Кафедраны ишини юсюнден а аны таматасы Валерий Хуранов билдиргенди. Презентация бардырып  аланы келечилери жарашдыргъан, бюгюнлюкде жашауда бардырылгъан  проектле бла да шагъырей этгенди. Аланы арасында Нальчикде  Шуёхлукъну аркасын, Жашил театрны, Малкада межгитни, «Успех» школну, «Инди» ашхананы да белгилерчады.  Андан сора да,  ара шахарны  арбазларын айбатландырыуда да аланы  уллу къыйынлары   барды. 

Валерий Хасанбиевич студентлеге тирирек болургъа, Интернетде бардырылгъан конкурслагъа къоркъмай къатышыргъа, кеслерин кёргюзтюрге, хорларгъа чакъыргъанды.

Ызы бла Хазрет Гукетлов  кафедрада архитектура-къурулуш проектирование жаны бла  жангы технологияланы сингдириуге аслам эс бурулгъанын, бюгюнлюкде окъуучула къаллай программала бла ишлегенлерин да  билдиргенди.    Мария Ефимова уа  жыйылгъанланы  «Анализ формообразования общественных зданий» деген магистр диссертациясы бла шагъырей этгенди. 

Ол кюн  сынамлы архитекторла  жаш коллегаларына  таукелирек болургъа, билимлерин ачыкъларгъа итинирге чакъыргъандыла эм уллу жетишимле  да тежегендиле.