Не заманда да къайда да къыйын эсе да – анда

Росгвардияны КъМР-де Управлениясында СОБР-ны отряды къуралгъанлы 26 жыл толгъанына аталып, къууанчлы жыйылыу болгъанды. Ол борчларын толтургъан кезиуде аманлыкъчыланы къолларындан ёлгенлени хурметине эсгертмеге гюлле салыудан, минут шумсуз туруудан башланнганды.

Управленияны башчысы полицияны полковниги Сергей Васильев юбилярланы алгъышлай, энчи буйрукъла толтургъан отрядда къуллукъ этиу артыкъда магъаналы эм жууаплы болгъанын чертгенди. «Сиз операцияланы бийик даражада толтуруп,   кёп санда аманлыкъчыланы тутхандыла. Не заманда да ал сатырдасыз»,-дегенди ол.

Ол право низамны сакълаучулагъа регионда законлукъну жалчытыу жаны бла борчларын бет жарыкълы толтургъанлары ючюн ыспас этгенди, алагъа насып, юйюрлерине мамырлыкъ тежегенди. 

Къуллукъларын бийик даражада толтургъанла уа ол кюн саугъала, грамотала къоллу болгъандыла.
Эсигизге салайыкъ, «Элбрус» отряд 1993 жылда къуралгъанды, биринчи ол КъМР-де Ич ишле министерствогъа бойсуннганды эмда  къуралгъан аманлыкъчы къауумлагъа къажау мадарланы толтургъанды. Бу жылланы ичинде аны 34 къуллукъчусу къырал орденле эм майдалла бла белгиленнгендиле. Алтаулан а Кишиликни орденине тийишли кёрюлгендиле (ёлгенден сора).