Жоюлуу

Къайдан да чыкъгъан болур эдиле бу наркотикле? Нечик палах салып барадыла халкъгъа. Бизни миллетге аны  ууу жетмез деп тура эдим да, жарсыугъа, болмады алай. Аны хатасындан къаллай юйюрле чачылып, гунч болгъандыла. Ма аллай бирини юсюнден сизге хапар билдирирге сюеме. 

 

Элде бу юйюрге сукъланмагъан жокъ эди. Солтан бла Баблина, жараулу журт да сюеп, сабийлени жете келгенин юйдегили этгендиле. Тёредеча, бек алгъа тамата жаш келин келтиреди, аны ызындан къыз тышына чыгъады. Бек гитчелери Толикге да,  тюз да аскерден къайтханлай, къатын алыр муратлары бар эди. Алай ол а юйге жаш къатынчыгъы бла къайтханды.

 

Ата-ана да жашны ол ишине артыкъ ыразы болмагъанлыкъгъа, не этерик эдиле, тёздюле. Келинчик да биринчи кюнледен башлап юйдегилени кёллерин алыргъа кюрешеди. Тюгел эки ай да озгъунчу, малкъар тилге да юйренеди. Тийреге да кесин сюйдюреди. Юйюрге эки жаш, къыз да тууадыла.

 

Тура эдиле аппа, ынна да  туудукъларына къууана. Алай къысха заманны ичинде кимни эсе да аман кёзю тийгенча болдула. Солтан ёлдю да, юйюр седирей, тозурай башлады. Кеси ёмюрюнде аракъы не болгъанын билмеген Толик, ичгичилеге  тагъылды да, ала аны бузгъунчу  тынчаймадыла. Ишге барып, ингирликде юйюне келир заманнга жолда  сакълап турур эдиле. Юйдегилери жалынып, урушуп, айып этип кюрешедиле, жукъ эталмайдыла. Келеди ингир сайын  кеф болуп. Сора  къышды, жайды, жауунду, балчыкъды деп къарамай, къарт анасын, къатынын, сабийлерин жалан аякълай юйден къыстайды. Бирде уа бахчада къуууп айланады. Тийреде жашагъан къоншула аз кере къутхармагъандыла ол насыпсызланы.

 

Жашларындан абаданы, заманы жетип, аскерге къуллукъ этерге кетеди. Къызы уа, бу къаугъаладан башын алып, артыкъ бек танымагъан жашха эрге барып къалады. Алай дауурла, тюйюшле бютюн кёп бола барадыла. Аланы кётюралмай, Толикни анасы тёшекге тюшеди, юй бийчеси жюрек ауруулу болады, юйден эсе больницада кёп кечинеди. Андан сора экиси да кёпге бармадыла. Бир бири ызларындан дунияларын алышдыла. Бир ненча замандан Толикни да орамда къатып тургъанлай табадыла. Ол аракъыдан да кючлю наркотикледен ёлгени  ачыкъланады.

 

Аталарыны аман юлгюсюнде ёсген жашла  игими боллукъ эдиле. Ала да, жарсыугъа, аны ызын ызладыла. Энди  наркоманы, ичгичиси болсун, аланы юйлерине жыйыладыла. Тийреде жашагъанланы арбазларында эки кёзден бирин къоймайдыла, урлайдыла, тонайдыла. Жашладан бирине бир сабий да тууады. Анга да кёзю къарамайды атаны.

Бир кесекден а къарындашларыны ачыуундан эгечлери ауруп ауушады. Аны да юч сабийи къалады. Ол заманда да жыймадыла жашла башларына акъыл, къоймадыла осал ишлерин, наркотикле, аракъы да аланы мыйыларын ашап бошагъандыла, бет дегенден бир зат да къалмагъанды.

 

Элде намыслары, сыйлары жюрюген иш кёллю аппалары бла ынналары къан къусуп ишлеген тюплю-башлы юй энди оюлургъа жетип турады. «Аманнга берсенг да- къабар, игиге бермесенг да- табар» деп, эрттегилиле айтыучулай, кёп жылла бла жыйылгъан ырысхы   наркотиклеге сатылгъанды. Жашла къолдан устала болгъанлыкъгъа, ишлерин  да къойгъандыла, орамгъа чыгъып, ётген-сётгенден ахча, гыржын тилей тебирегендиле.

 

Бир кече уа аланы абаданырагъы къоншулагъа шприц тилей барады. Ала уа аны бет сыфатындан элгенедиле. Жаш, къол аязы бла жухун жабып, башха къоншулагъа кирди. Алай анда да тапмады  излегенин. Къайтып бара эди бахчаны ичи бла, биринчи къарда аякъ ызларын къоя… Эрттенликде уа къоншула эки жашны да ёле тургъанлай тапдыла. Ала  полда аунап, ауузларындан а кёмюк келе тура эди. Аны кёрген тийре жашладан бири олсагъат терк болушлукъ берген машинаны чакъырды. Врачла къолдан келгенни аямадыла… Не медет, аланы ёлюмден къутхарыр амал жокъ эди.

 

Бир кечеге эки ёлюк. Эки жаш хайт деген заманларында жашаудан кетдиле. Аллай уллу багъаны наркотикле ючюн берирге уа керекми эди?