Бизни адепли, хатерли Лена

-Элибизге аллай келин кирген барыбызны да насыбыбызды. Аны аллына бармагъаныбыз жокъду, бирибизге да уллу кёллюлюк этмейди, бек сакъды. Келсенг, жарыкъ тюбер, намыс,сый берир, ызынгдан ашыра чыгъар, - дейди Габоланы ( Текуланы ) Лейля,  Яникойну амбулаториясына кёп жылланы ичинде башчылыкъ эте келген  Чыпчыкъланы  Ленаны сагъыннганымда. 

Мен редакциядан амбулаториягъа келгенде,   кесине къаратыргъа кезиуюн сакълап  тургъан   Геграланы Ханифа да олсагъат аны юсюнден айтып тебиреди: «Ол эллилерине алай жарайды, аны  айтып бошаялмазса. Къуру ишини юсю бла  угъай, къууанч, бушуу болуп да бир адамгъа уллу кёллюлюк этмез, сау болсун! Къартха - къартча, жашха жашча  болур. Сабийчикле бла сёлешгенини уа не багъасы барды. «Бизни Лена»,- дейдиле анга эллиле».

Аны бла бирге врачха кирдик. Огъурлу бетли, чырайлы  тиширыу саусузгъа эсин буруп, ашыкъмай жюрегин тинтеди,къаныны басымын  ёнчелейди, соруула береди, сора аллына келгенни  айтханына сабыр тынгылайды. Ариу айтып кёллендиреди.

Ол  узакъ тау эллени биринде - Булунгуда - туугъанды. Атасы Чыпчыкъланы Азрет бла анасы Жаникаланы Фатимат (жаннетли болсунла), сабийлерине адеп-къылыкъ,намыс-сый жашауда  баш магъананы тутханларын  сингдиргендиле.Ол  Ленаны юсюнде кёрюнюп турады. Школну айырмалы бошагъандан сора къыз Къабарты-Малкъар къырал университетни медицина факультетине киреди, аны тауусуп, ызы бла уа ординатураны, аспирантураны да жетишимли бошайды.

Яникойгъа да намысы бийикде болгъан тукъумгъа, юйюрге келгенди. Аны баш иеси  Газаланы Залимни танымагъан  болмаз. Ол кёп жылланы элге  башчылыкъ этип тургъанды. Бусагъатда уа Чегем районну иш бла жалчытхан бёлюмюню таматасы болуп ишлейди. Къайда урунса да, жамауатына эс бёлгенлей турады.  Жаш тёлюге да болушады, онг тапдырады.  Анга да эллиле чексиз ыразыдыла.  Бу юйюр юлгюге айтылырчады,  жашлары да, кеслерича  адеплиле, намыслыла.

Биргесине ишлегенлеге да Лена алай игиди. Басымлы, акъыллы сёзю,оюму бла да болушханлай, къайгъыргъанлай турады. Ишде къайсы бири да бир бирге бек игидиле,ол а башчыны хайырынданды.  «Таматабызгъа бек ыразыбыз. Ол бизни барыбызгъа  да  огъурлу бетден  къарайды.  Тюз да бир  къаршы адамыбызча,  юйлерибизде окъуна да болумубузну, онгубузну биледи, ангылайды, не жумушубузда да къатыбызда болуп, билеклик, болушлукъ этеди. Къууанчыбызгъа къууана, жарсыуубузгъа жарсый биледи»,-дейдиле  ишчи нёгерлери.

-Елена Азретовна кесин жюрюте билгени, сёлешгени эмда кёп башха ышанлары бла бизге юлгюдю. Таматабызча, керекли заманда  тырман да этер, алай  махтамай да къоймаз.  Жашауумда бир адамгъа ушаргъа сюе эсем - ма олду, - дейди  терапевт  Жантуудуланы Асият.   

Сёзюбюзге  процедуралы  кабинетде ишлеген Малкъарланы Анета да олсагъат къошулады:
- Лена, жыл санына да къарамай,  кёпню билген адамды. Ишинден тышында да, жашауну, адет-тёрелени юслеринден  биз андан сорургъа, аны бла оноулашыргъа  излейбиз. Ол  барыбызгъа да аналыкъ, эгечлик да эте келеди,-дейди.  
Врачха ийнаныргъа, ышаныргъа да керекди. Аны  уллу магъанасы барды саусузну багъыуда. Сабий докторгъа уа  ол ышаныулукъ бютюнда керекди. Къагъанакъ неси къыйнагъанын айталмайды, аны билир ючюн, керти окъуна  усталыкъ, жюрек сезим эмда уллу жууаплылыкъ да керекдиле. 

Ленада ала бардыла. Анданды,  сабийлери аурусала, кече-кюн демей, аны излегенлери.  Аны уа не ачыуланнган,не арыгъанма деп къойгъан къылыгъы жокъду, не заманда да ол  болушлукъ берирге хазырды.  Ма аны ючюн сюеди аны  элни жамауаты, бирден  сый - намыс бергени, ариу сёзню къызгъанмагъаны да аны ючюндю.
«Къабарты -Малкъар Республиканы сыйлы врачы» деген атны да Лена бет жарыкълы жюрютеди.  Алай бек багъалы саугъагъа уа  ол эллилерини, бир  жерлилерини ыспас сёзлерин санайды. Керти окъуна, жамауатны ыразылыгъы,махтауу неден  да хычыуунду адамгъа.