Кёплеге сейир боллукъ филиал

Быйыл «Билим бериу» миллет проектни жашауда бардырыуну чеклеринде «Халал ишлени региону» деген ат бла волонтёрлукъгъа тутхучлулукъ этиуге жораланнган конкурс бардырылгъанды. Бизни республика алчыгъа саналгъанды. Аны бла байламлы КъМР-ни Жарыкъландырыу, илму эмда жаш тёлюню ишлери жаны бла министерствосу «Волонтёрлукъну айнытыуну ресурс арасы» автономлу коммерциялы болмагъан организация бла бирге сагъынылгъан араны муниципал районлада филиалларын ачыуну къолгъа алгъанды.

Аллай бёлюм кёп болмай Элбрус районда да ачылгъанды. Тырныауузну бешинчи номерли гимназиясында болгъан къууанчлы жыйылыугъа жарыкъландырыу, илму эмда жаш тёлюню ишлери жаны бла министрни орунбасары Мокъаланы Ачемез, районну администрациясыны башчысыны биринчи орунбасары, билим бериу управлениясыны таматасы Атаккуланы Нуржан, школланы волонтёр организацияларыны келечилери, бирсиле да келгендиле.

Хурметли къонакъла ары жыйылгъанланы алгъышлагъандыла. Ызы бла уа кеси ыразылыкъларында инсан башламчылыкъларына тутхучлулукъ этиуге эмда системалы айнытыугъа жораланнган программаланы бла проектлени презентациялары болгъанды.
Ахырында огъарыда сагъынылгъан араны бла районну келечилери байламлыкъланы юсюнден келишимге къол салгъандыла. Тюбешиуге келгенле алагъа сейир болгъан соруулагъа ангылашыныулу жууапланы да эшитгендиле.