Хорлам жокъ эсе да, тенг эсеп

Россейни футболдан профессионал лигасыны «Олимп» биринчилигини ахыр матчларында «Спартак-Нальчик» командабыз Владикавказдан «Спартак» эм Майкопдан «Дружба» клубла бла тюбешгенди. Футболчуларыбыз эки оюнда да жетишимли болгъанларын, талай ачыулу хорламдан сора эс жыйгъанларын, халатланы эсге алып, биригип ойнай билгенлерин ачыкълагъандыла.

Владикавказдан команданы бизни спартакчыла 3:0 эсеп бла ууатхандыла. Голланы Дохов,  Бацев бла Хачиров ургъандыла. Къоншу спартакчылагъа быллай хорлатыу бек къоркъуулуду, нек дегенде алада бусагъатда «Олимпден» чартламаз ючюн кюреш къаты барады, ала энди келир оюнларында очкола жыяргъа аяусуздан кюрешириклери баямды.

Ызы бла «Спартак» «Дружба» команда бла тюбешгенди. Бир-бирде нальчикчиле тыш майданлада иги ойнамаучудула. Болсада, ала Майкопчуланы хорламагъан эсле да, матчны тенг 1:1 эсеп бла бошагъандыла.  Голланы бизникиледен Ольмезов (80), «Дружбадан» да Клыша (37) ургъандыла. Спартакчыла кючлюрек болгъанларын, матчны ахыр такъыйкъаларына дери топха, майданнга иеликни ычхындырмагъанларын белгилерчады. Эсепни командабыз 37 минутда топну къаршчы команданы къабакъларына кийирип ачханды. Ол иги кесек заманны тюрленмей тургъанды, жангызда 80 минутда майкопчула, бир гол уруп, аны тенг этгендиле.

«Дружба» бла оюндан сора, командабызны баш тренери Сергей Трубицын футболчуларыбыз, ахырына дери туруп, топну ийдиргенлери ачыу тийгенин билдиргенди. «Футболда алайды – не сен ураса гол, не санга урадыла. Абыннгандыла, ол а быллай эсепге келтиргенди. Матчны юсюнден толусунлай айтханда, аман ойнагъанбыз, бютюнда жауундан сора мылы стадионда чапхан тынч болмагъанын эсге алсакъ, хар не да тапды. Бу команда бла биз алгъадан да шагъырей эдик, аны кючлю, къарыусуз жерлерин, ойнау халларын, чабыууланы къалай этгенлерин, къалай къорууланнганларын да билгенбиз. Спортчуларыбызгъа ыразыма», - дегенди ол.

Владикавказны командасы турнир таблицаны ахырында орналгъанды, баям, аны хорлагъан артыкъ къыйын да болмаз эди. Алай «Дружба» алчыланы санындады, аны бла оюнну былай бошау, айхайда, ахшыды. Командабыз бусагъатда таблицаны ортасындады, шабат кюнде кесини стадионунда «Урожай» клуб бла тюбеширикди, андан сора ол жерин алышындырына ышанырчады. 

Кульчаланы Зульфия.
Поделиться: