Табийгъатха жууукъ болурча

Кёп болмай Къабарты-Малкъарны къырал бийик  - тау заповеднигинде Агъач мюлкде уруннганланы  кюнюне жоралап уллу акция бардырылгъанды. Анга Къашхатауну Чеченланы Ш.Ш. атлы орта школуну эм Нальчик шахарны 10-чу номерли орта школуну окъуучулары къатышхандыла.

- Акцияны чеклеринде заповедникни экология жарыкъландырыу эм билдириу туризмден бёлюмюню келечилери   агъашчыланы профессионал байрамларыны эм  ишлерини  юсюнден  презентация ётдюргендиле.  Ала  кийик табийгъатны сакълауда магъаналы эмда уллу борчну толтургъанларын, жанларына  къоркъмай  агъачны, жаныуарланы да ёртенледен, браконьерледен къоруулагъанларын  билдиргендиле, -дейди заповедникни таматасыны орунбасары Тогъузаланы Лейля.   

Ол кюн сабийле  «Знаток леса» эм «Заповедная тропинка» деген викториналагъа да къатышхандыла.    Табийгъатны музейинде уа  «Мен табийгъатха жууукъ болургъа сюеме» деген сурат  кёрмючге къарагъандыла. Тамаша жерле бла шагъырейленнгендиле. Къабарты-Малкъарны  ариулугъун  толу сезерча,   заповедникни юсюнден кинофильм да кёргюзтюлгенди.  

Ахырында  акциягъа къатышханлагъа  дипломла эм эсде къалырча  саугъала берилгендиле. Заповедникни келечилери уа педагоглагъа бла окъуучулагъа ыразылыкъларын билдиредиле.

Магометланы Сулейман.
Поделиться: