Казбек Коков Россейни Президентинде Стратегия айныу эмда миллет проектле жаны бла советни президиумуну жыйылыууна къатышханды

   Москвада РФ-ни Правительствосуну Председатели Дмитрий Медведев Россейни Президентинде Стратегиялы айныу эмда миллет проектле жаны бла советни президиумуну жыйылыуун бардыргъанды. Аны ишине видеоконференция байламлыкъ амал бла КъМР-ни Башчысыны къуллугъун болжаллы халда толтургъан Казбек Коков да къатышханды.
     Экономиканы бла социал бёлюмню айнытыуну Владимир Путинни май указларында белгиленнген жангы борчларын толтуруугъа, деп эсгертгенди премьер-министр, къыралны, бизнесни, жамауатны да жанындан иги кесек ырысхы бёлюннгенди. «Жууукъ юч жылда биз миллет проектлеге деп 5,7 триллион сом чакълы бир къоратыргъа белгилегенбиз. Ол а биз мурат этгенден эсе  асламды. Ол ахчаны кереклисича эмда аяулу хайырланыргъа керекди.  Сёз къыралда бир заманда да болмагъанча магъаналы оноуланы юслеринден барады. Ишни баш амаллары – 12 миллет проектди эмда магистраль инфраструктураны жангыртыуну бла кенгертиуню комплекс планыды»,-дегенди ол.
     Дмитрий Медведев регионланы башчылары ол стратегиялы документлени жарашдырыугъа тири киришгенлерин чертгенди. «Субъектлени оноучулары баш борчларын, биз аладан не сакълагъаныбызны эмда ала федерал бюджетден къаллай     бир болушлукъ аллыкъларын шарт билирге керекдиле. Кезиуден кезиуге ол иш къалай баргъанын, къаллай онгла бла къоркъуула тюбегенлерин билип турургъа тийишлиди. Белгиленнген жолдан таймаз ючюн, ахыр муратларыгъызны унутмагъыз, контрольну кючлендиригиз, проектле къалай толтурулгъанларына кёз-къулакъ болгъанлай туругъуз. Бизни борчубуз – келир жыл адамларыбыз, къыралыбызны инсанлары иги жанына тюрлениулени сезерча этиудю, айныуну миллет муратларына жетиуге жол ишлергеди»,-деп къошханды Дмитрий Медведев.
   Жыйылыуда миллет проектлени паспортларыны ахыр тюрлюлерине къаралгъанды эмда ала къабыл кёрюлгендиле. Ала Президентни буйрукъларында болгъан баш кёрюмдюле эсге алынып жарашдырылгъандыла, алада энчи иелени ахчаларын къошууну амаллары белгиленнгендиле, миллет проектлени регионла бла байламлы кесеклери шарт тохташдырылгъандыла.
      Къабарты-Малкъар Россейни Президентини Указында белгиленнген ишлени толтуруп башларгъа хазырды. 12 миллет проектни  республика къатышыргъа мурат этген 50 бёлюмюне кёре регион программаланы паспортлары къабыл кёрюлгендиле. Тохташдырылгъан кёрюмдюлеге кёре КъМР-ни бюджетине да тюзетиуле кийирилгендиле. Проектлени толтуруугъа башчылыкъ этиуню къыйматлы системасын къурау жаны бла иш бошала турады. «Проект офисни» борчлары КъМР-ни Экономиканы айнытыу министерствосуну боюнуна салыннгандыла.