Эркинликлери жыйырма жылгъа дери сыйырылыргъа боллукъду

Быйыл 26 сентябрьде оператив-излеу жумушланы кезиуюнде РФ-ни МВД-сыны Нальчикде Управлениясыны наркотиклеге къажау  управлениясыны къуллукъчулары «Сосруко» ресторанны тийресинде Май районну Александровское элинден эр кишини бла аны юй бийчесин тутхандыла. Право низамны сакълаучула ала  жашырын жерден артмакъ чыгъара тургъан кезиуде тохтатхандыла.

Жаш адам наркополициячылагъа скотч бла чырмалгъан артмакъны бергенди. Аны ичинде 50 къызыл тюрсюнлю контейнер бар эди.  

Аны айтханына кёре,     аланы ичиндеги «Туз»  наркотикди. Ол аланы республикада жашырын жерледе букъдуруп, андан ары сатар мурат бла алгъанды.

Экспертиза сыйырылгъан зат «N-метилэфедрон» уу болгъанын, аны ауурлугъу 52, 15 граммгъа жетгенин кёргюзтгенди. Тинтиуле бардырып, полициячыла 31-жыллыкъ эр киши алгъын да быллай аманлыкъ ючюн жууапха тартылгъанын тохташдыргъандыла.

Эр кишиге бла аны юй бийчесине РФ-ни Уголовный кодексини 228.1-чи статьясыны 4-чю кесегини «г» бёлюмюне кёре терслеу материалла ачылгъандыла - законлагъа бузукълукъла этип, наркотиклени (психотроп затланы) хазырлагъанлары, асырагъанлары, биргелерине жюрютгенлери эм  сатханларына ючюн. Быллай аманлыкъ этгенни эркинлиги 10 жылдан 20 жылгъа дери сыйырылыргъа боллукъду.