Наркомания багъаргъа онг ахырда болмагъан аурууду

Тырныауузну 3-чю номерли орта школуну 8-чи классыны окъуучулары «Сабийлени къоркъуусузлукълары эм саулукълары ючюн» деген акциягъа къатышхандыла. Алагъа къонакъгъа Элбрус районну прокуроруну орунбасары Азамат Кокоев, прокурорну болушлукъчусу Узеланы Жамиля эмда акъылбалыкъ болмагъанланы ишлери жаны бла инспекторла келгендиле.

Тюбешиу ушакъ халда баргъанды, анда   наркотиклени законсуз сатыу-алыуну тохтатыуну,  уу адамны саулугъуна къаллай заран салгъаныны юслеринден айтылгъанды. Азамат Кокоев жашлагъа бла къызлагъа наркотикле бютюнда сабийни чархларын бузгъанын ангылатханды. Сёз ууну жарашдырыу, аны сатыу, асырау ючюн къаллай уголовный жууаплылыкъ болгъаныны юсюнден да баргъанды.

Полициячыла жаш адамланы быллай аманлыкъланы профилактикасына къатышыргъа, право низамны сакълаучулагъа болушургъа, наркотиклени жарашдыргъанланы, аланы сатханланы юслеринден шартланы биле эселе, полициячылагъа белгили этерге чакъыргъандыла. Наркомания багъаргъа онг ахырда болмагъан аурууду, аны ючюн а бу осал ишге къатышыргъа жарамайды  деген чакъырыу бла бошалгъанды тюбешиу.