Электрокючню къоркъуусузлу хайырланыуну юсюнден

«Россети Шимал Кавказ» компанияны Къабарты-Малкъарда бёлюмюню – «Каббалкэнергону» специалистлери электрокючню къоркъуусузлу хайырланыргъа юйретген, кеси да школчулагъа деп къуралгъан кезиулю дерслерин бардыргъандыла. Алай бла, кёп болмай, ала Нальчикде «Тейри къылыч» санаторийде болгъандыла, деп билдиргендиле предприятияны пресс-службасындан.

Энергетикле сабийлеге электрокюч приборланы хайырланыуну юсюнден оюн халда хапарлагъандыла, ток бла ишлеген объектлени къатларында кеслерин къалай жюрютюрге кереклисин да ангылатхандыла. Аллай тийреледе къоркъуу болгъаныны юсюнден билдириуле нени юсюнден айтханларын билдиргендиле, аланы къаллай тюрлюлери болуучусун да кёргюзтгендиле.

Ызы бла сабийле токну юсюнден не зат билгенлерин викторинада ачыкълагъандыла. Энергетикле алагъа дагъыда электрокюч уруп ачыгъан адамгъа биринчи медицина болушлукъну къалай берирге кереклисин кёргюзтгендиле. Жорукъла эслеринде къалырча, суратлада кёргюзтюлген басма материалла эмда орузламала юлешгендиле кеслерине да.

Дерсде айтылгъан эмда кёргюзтюлген хар неге да сабийле уллу эс буруп тынгылагъан эдиле. Специалистле бла бирге «Гоша» деген тренажёрну юсюнде ток ургъан адамгъа къалай болушургъа боллугъун да кеси кёзлери бла кёргендиле. Бирлери уа энергетиклени къоруулаучу затларын: каскаларын, къол къапларын, токну ётдюрмеген аякъ кийимлерин кийгендиле.

Сабийлени ток ургъандан сакълау профилактика жумушлагъа энергетикле уллу магъана бередиле. Ол себепден быллай дерслени кезиу-кезиу бардыра туруучудула, школчула бла тюбешип, адамны жашаууна терен сингнген электрокючню хайырыны бла хатасыны юсюнден толу хапар билдирирге кюрешедиле.

Улбашланы Мурат хазырлагъанды.
Поделиться: