Чегемлиле айырыулагъа тири къатышадыла

Чегем районда РФ-ни Президентини айырыулары къалай бардырылгъанын билир мурат бла биз аланы бир къауумунда болгъанбыз. 307-чи номерли айырыу участок районну ара Маданият юйюнде орналады. Арбаздан окъуна жарыкъ макъамла эшитиледиле. Дагъыда аны тийресинде ата-аналары бла келген сабийлеге заууукълукъгъа деп батутла да орнатылгъандыла.

 Айырыу участканы таматасы Лариса Ворокова айтханнга кёре, эрттенли келгенлени эсеплерин ала алыкъынчы чыгъармагъандыла, алай шабат кюн жабылгъанда 2810 адамдан 2500 адам кеслерини инсан борчларын толтургъандыла.

- Жыл саннга кёре, тирирек 40 жылдан абаданладыла деп айтыргъа боллукъма. Дагъыда саулукълары бла байламлы неда бир тюрлю башха сылтаула бла кеслери бери келалмагъанланы юйлерине жюрюйбюз, -дегенди ол.

  Айырыулагъа къараучула да мында биринчи кюнден бери турадыла. Ала КПРФ-ни бла КъМР-ни Жамауат палатасыны келечилеридиле.

  - Маданият юйню коллективи келгенлеге концерт программа бла тюбейдиле, кёллерин кётюредиле. Хар ким да игиликге, ашхылыкъгъа ийнанады да, биз да анга себеплик этерге хазырбыз, - дейди Лариса Хусейновна.

                                                                                          ***

  Республиканы тийресинде 301-чи номерли участка Хушто-Сыртда орнатылыпды. Анда къол кётюрюрге эркинликлери болгъанланы саны битеу да 502 адам болады.

  Бюгюн 12 сагъатха ары келгенлени саны 83 процентге жетгенди, деп билдиргенди бизге айырыу участканы таматасы Хуртуланы Аслан.

  - Элибиз уллу болмагъаны себепли, иш терк барады. Кеси алларына бери келалмагъан абадан тёлюбюзге кесибиз барабыз. Комиссияны келечилери ол жумушну сюйюп тамамлайдыла. Мында бир бирге жууукъ жетмеген хазна адам жокъду. Аны себепли, таматаларыбызгъа хурмет уллуду. Ала да келгенлеге ыразы болгъанларын билдирип, айырыулагъа тири къатышадыла, - дегенди ол.

    Таппасханланы Аминат.