Миллетлени эм динлени келечилерини араларында келишиулюкге – баш магъана

Элбрус районну администрациясында  миллетлени эмда динлени араларында халланы тапландырыу жаны бла комиссияны кезиулю жыйылыуу болгъанды.  Анга граждан обществону институтлары бла байламлыкъла эм миллетлени ишлери жаны бла министрни орунбасары Гергъокъланы Жамбулат,  министрни болушлукъчусу Руслан Биазиров да къатышхандыла. Жыйылыуну районну таматасыны биринчи орунбасары Арслан Улимбашев бардыргъанды.

Администрацияда социал соруула жаны бла баш специалист Малкъондуланы А.Х. докладында билим бериу,  культура, спорт сфералада, жаш тёлю политикада тамамланнган жумушланы юслеринден билдиргенди. Алагъа уа ич ишле органланы, дин эм жамауат организацияланы   келечилери, школчула да тири къатышадыла.

Бюгюнлюкде районда жаш тёлюню арасында келишиулюкню сакълау жаны бла уллу иш толтурулгъаны белгиленнгенди. Анда уа орта эм профессионал эмда къошакъ билим берген учрежденияланы къыйынлары уллуду. Тюрлю-тюрлю миллетлени келечилери бирге спорт секциялада, кружоклада, клублада юйренедиле, волонтёр ишге къатышадыла. Ол а ёсюп келген тёлюню арасында шуёхлукъну кючлерге себеплик этеди.

Жыйылыуда бардырылгъан жумушланы хайырлылыкъларын игилендириу жаны бла эсгертиуле этилгендиле. Власть органла, дин организацияла да элледе жаш тёлю бла байламлыкъланы жюрютюрге кереклиси да чертилгенди. Битеу бу мадарла уа къайгъыланы, даулашланы тохтатыргъа себеплик этгени белгиленнгенди.