Биринчи видеомагнитофон

Озгъан ёмюрню ортанчы жылларына дери аберини видеогъа тюшюрген жаланда бир амал болгъанды – кинокамера. Ол информацияны плёнкагъа жаза эди. Кинотеатрлада уа энчи аппаратла плёнканы буруп алай кёргюзтгендиле видеону. Алай телевидение къуралгъаны бла кинокамера анга чыртда келишмегени белгили болады. Нек дегенде, бериуле тюзюнлей эфирде чыгъаргъа керек эдиле. Аллай камера уа студияда олтургъанланы пленкагъа тюшюрюп, ызы бла олсагъат окъуна эфирге жибераллыкъ тюйюлдю. Аны ючюн жангы амал излеу башланады.

Тинтиуле бла башхала да кюрешген болур эдиле, алай биринчи видеомагнитофонну АБШ-да Ampex фирма къурагъанды. Аны уа иеси ким эди десегиз – орус иммигрант Александр Михайлович Понятов.

Сейир шарт: фирманы атында биринчи юч харф бу адамны кесини эмда атасыны атларыны, сора тукъумуну ал харфларыдыла, къалгъан экисин а ол ингилиз тилде excellency сёзден алгъанды. Орусча ол «сизни жюйюсханлыгъыгъыз» деп алайды. Патчахны аскеринде полковник болуп тургъан Понятовну кесине алай айтыргъа эркинлиги бар эди дерге боллукъду.

Алайды да, бу компания биринчи видеомагнитофонун 1956 жылда 14 мартда кёргюзтеди. Аны жаланда телестудиялада хайырланыргъа боллукъ эди. Уллу, багъалы болгъаны ючюн, аны кесини юйюне сатып алыргъа бир кишини да башына келлик тюйюл эди.

Конкуренция болмагъаны себепли Ampex видеомагнитофоннга сурам бек уллу болгъанды. Бир кезиуде видеогъа жазыугъа «ампексирование» деп алай айтып да тургъандыла.

Совет Союзну башчысы Никита Хрущёв 1958 жылда АБШ-ны Москвада кёрмючюнде болгъанында, ол къыралны посолу бла тюбешгенин видеода кёрюп, «андан осал болмагъан» видеомагнитофон къураргъа буйрукъ береди. Эки жылдан сора «Кадр» деген биринчи совет аппарат чыгъады.