Шуёхлукъну эмда сюймекликни юйю

Шахарны тауушларындан букъгъанча, Мальбахов атлы орамдагъы кёп къатлы юйлени  арбазында  орналгъан 38-чи номерли  «Дюймовочка» сабий садны уллу да, кенг да арбазы  тюрлю-тюрлю байракъчыкъла бла  омакъ жасалыпды. Къайры къарасанг да, тизгинлилик, тазалыкъ эсленмей къалмайды. Тюрсюнлю шарла, байракъчыкъла, алтын харфла бла  «60 жыл» деген жазыула да кёрюнедиле.  Балачыкъла да  омакъ кийинип келгендиле. Аланы экинчи юйлери юбилейин белгилейди. 

Жарым ёмюрден  аслам заман мындан алгъа ачылгъан бу садны тышы, ичи да тюрленнгендиле, анга жангы мекям да къошулгъанды. Мында  ишлегенле, Сабанчыланы Асиятны башчылыгъында алагъа салыннган борчну магъаналылыгъын ангылап, тутхан ишлерин айыпсыз  толтурадыла, деп таукел айтыргъа боллукъду. Анга  мекямны энчи отоуунда тагъылгъан кёп махтау грамотала, дипломла, саугъала да шагъатлыкъ этедиле.

Школгъа дери билим  берген бу учрежденияны байрамына  кёп къонакъ келгенди. Аланы араларында  Нальчик шахар администрацияны башчысыны орунбасары Атмырзаланы Земфира, шахарда билим бериу департаментни башчысы Алим Мальбахов, Халкъгъа билим бериуде эмда илмуда  ишлегенлени профсоюзларыны жамауат организациясыны башчысы  Татьяна Вологирова, сад бойсуннган 31-чи номерли мектепни директору Анзор Егожев, битеулю билим бериуню сыйлы ишчиси  Светлана Хажалиева да болгъандыла.  Сёзсюз, ол кюн тюрлю-тюрлю жыллада юйретиучюле болуп ишлегенле,  ары жюрюген, бусагъатда уа уллу жашла бла къызла  болгъанла да  келгендиле.

Къонакъла къуру къоллары бла келмегендиле. Атмырзаланы Земфира КъМР-ни Жарыкъландырыу эм илму министерствосуну сыйлы грамотасын юйретиучю Жанна Соговагъа бергенди, ведомствону Ыспас къагъытына уа  Лариса Макарова тийишли болгъанды. Нальчик шахарны жер-жерли администрациясыны грамоталары эмда бюсюреу къагъытлары бла уа Анжелика Хачетлова, Лилия Стриг, Вера  Хатшукова, Любовь Кирилюк  саугъаланнгандыла.

Садикде биринчи кюнледен ишлеп башлагъанланы атлары да  айтылмай къалмагъанды. Биринчи тамата болуп онбир жылны ишлеген Мария Земляная, андан сора келген Рахимат Шомахова, Вера Ющенко, Людмила Шепитько, Светлана Хажалиева белгиленнгендиле.

Сабий садха тюрлю-тюрлю жыллада жюрюгенле: Юлия Стриг, «Гелиос»  тепсеу къауум,  дауурбасчыланы «Кавказны макъамлары» деген ансамбли, алагъа белгили къобузчу Башийланы Фатимат, юйретген сабийчикле да  къошулуп, орус, малкъар, къабарты тилледе назмула, жырла айтхандыла, тепсеулери, музыкалы инструментледе согъуулары  бла да къонакъланы кёллерин кётюргендиле. Байрам шёндю бери жюрюген сабийлени «Мени Къабарты-Малкъарым» деген жырны айтыулары бла бошалгъанды. 

Тарыхны бетлерин ача, быллай шартланы кёребиз: садик 2006 жылдан башлап  31-чи номерли мектепни бир кесеги болады. 2020 жылны декабрь айында уа «Дюймовочкагъа» филология илмуланы кандидаты Сабанчыланы Асият башчылыкъ этип башлайды. 2021 жылны май айында уа ясли  да къуралады.  2022 жылны сентябрь айында уа юч къауумгъа деп,  балачыкълагъа  жангы мекям эшиклерин  кенг ачады. Жарыкъ, эркин физкультура залы, медицина бёлюмю да бюгюнлюкде кенг хайырланыладыла. 

Бюгюнлюкде бери 418 сабий жюрюйдю. Юйретиучюлени, устазланы, аш этиучюлени,  врачны, медсестраны  да  бийик эмда энчи билимлери бардыла, ала кёп жаны бла фахмулуладыла, ишлерине жууаплы кёзден къарагъан,  тынгылы тамамлагъан адамладыла.