Бизнесни жашырынлыкъларын – жаш тёлюге

Кёп болмай «Иш кёллю Россей» жамауат организацияны Къабарты-Малкъарда  бёлюмю къурап   гуманитар-техника колледжде  тюбешиу ётгенди. Аны кезиуюнде    XVI жаш тёлю бизнес-школ  иши бла байламлы презентация болгъанды.   Проектни магъанасы жаш адамланы  предпринимательстволукъну тасхалары бла шагъырейлендирирге эм урунургъа болушургъады. 

 Тюбешиуде  предпринимательствону   юсюнден   сагъынылгъан жамауат  организацияны толтуруучу таматасыны орунбасары Таумырзаланы Салидат эм  маркетолог, бизнесни айнытыу жаны бла эксперт Гузеланы  Индира  хапарлагъандыла.

Анга  къатышханла ишни юсю бла тюз  сёлеше билирге,  байламлыкъ къураргъа,    бизнес-проектлени бардырыргъа, оноу этерге,  къауум адам бирге ишлерге, СКФО-да бла регионда  сынамлы  предпринимательле бла  топ-менеджерлени  юлгюлеринде юйренирге эм башха  затладан билимлерин  ёсдюредиле.

Къыйматлы проект 2008 жылдан  бери бардырылады. Бюгюнлюкде анга  беш жюзден аслам адам къатышхандыла эм эки жюзден артыкъ бизнес-план жашауда бардырылгъанды. Жаш специалистлени  танг кесеги къырал ишледе,  энчи бизнесде  урунургъа онг тапхандыла. Аланы арасында  кеслери бир тюрлю иш ачханла да аз тюйюлдюле. 

Тюбешиуню ахырында «Иш кёллю Россей» жамауат организацияны келечилери  студентлени кёп тюрлю  сорууларына тынгылы  жууапла  бергендиле.

Ахырында  проектге къатышыргъа сюйгенлерин  танг кесек адам билдиргендиле. 

Поделиться: