Чагъырны къолдан сатып алмагъыз

Жангы жылны байрамына халкъны асламысы бек тынгылы хазырланады. Ол кюнлеге аш-азыкъ, суула, чагъырла сатыу бютюн къаты барады. Жарсыугъа, аллай кезиуледе аманлыкъчыла да тириледиле.
Роспотребнадзорну Къабарты-Малкъарда бёлюмюнде айтханларына кёре, чагъыр сатып алырдан алгъа талай жорукъгъа эс буругъуз. Россей Федерацияны законодательствосу бла аракъыны эмда аллай башха продукцияны жол жанларында, оптовый неда розница рыноклада, маршрут транспорт тохтаучу жерледе орналгъан тюкенледе алыргъа жарамагъанын билигиз. Аланы къолдан-къолгъа неда Интернет бла сатыугъа да чек салынады. Алагъа алданнган кеси саулугъуна, бирде уа жашаууна да къоркъуу салады.
Быллай продукцияны сатыу бла кюрешген организацияланы къолларында тийишли лицензия болургъа керекди. Бу документ тюкенде адамла кёрюр жерде тагъылады.
         Россейде чыгъарылгъан аракъыны неда чагъырны шешасында энчи марка болургъа керекди, тыш къыралладан келтирилгенде уа – акциз марка. Экилерини да этикеткаларында орусча быллай шартла жазылыргъа керекдиле: продукцияны аты, ёлчеми, стандарты, нелляй бир спирти, бал тузу эмда (бар эсе) ГМО болгъаны, къурамы, хайырланыргъа жараулу болжалы, къайда эмда къачан чыкъгъаны, багъасы, предприятияны адреси эм башхала.
        Продукцияны качествосуна бир тюрлю сорууугъуз чыкъса неда аны сатыуда бузукълукъ эслесегиз - Роспотребнадзоргъа сёлешигиз. Дагъыда эсде тутугъуз, быллай затланы артыгъы бла хайырланыу саулукъгъа бек осалды!

 

ОМАРЛАНЫ Мурат.
Поделиться: