Окъуугъа кирип, умутум толса

 Кёнделенни Энейланы Тимур атлы 4-чю номерли школуну окъуучусу Хуртуланы Джамиля быйыл школну бошай турады. Кесине къаллай иш усталыкъ сайларгъа сюйгенини юсюнден сорууума уа былай жууап бергенди:

-Мен сабийлигимден окъуна врач болургъа муратым бар эди. Нек дегенде, къартла бла ёсгенме. Адам уллая барса, аны  саулукъ жаны бла жарсыуу кёпден-кёп болады. Аллай саусузланы амалсыз, саз бетлерин кёрсем, алагъа болушуругъум келеди. Гитчелигимде уа, уллу болсам, атамы бла анамы кишиге ышанмай, кесим багъарыкъма, деучю эдим. 

Жыл саным жете келгенлей, тиш докторлукъну бегирек сайлагъанымы ангылайма. Башха иш усталыкъланы араларында бу усталыкъны нек сайлагъанымы, артыгъыракъ да даражалы нек кёргеними былай ангылаталама.   Усталыкъны хар адам кеси сайлайды. Алай Аллахдан келген фахмунг бла сайлагъан ызда кесинги кёралсанг,  аны бек уллу насыпха санайма. Тишлеге бакъгъан доктор болургъа сюйгеними дагъыда барды сылтауу. Мени оюмума кёре, адамланы санларында неда ич органларында бир зат къыйнаса, ала аны ахыргъа дери тёзюп, врачха бармай, кёпле уа оздуруп окъуна къоядыла. Тишлери болмаса уа, ашны сюйгенлерича ашаялмасала, тиш аурууну кесине да тёзалмазлыкъ сунама.  Тиши болмаса, адамны бети да тюрленеди.  Мен да  тиш докторлукъ ызда  адамлагъа  жарар муратдама.  Окъуугъа кирип, умутум толса.

Темуккуланы Асият.
Поделиться: