Полицияны ишини юсюнден оюмларын сабийле билдиргендиле

Полицияны генерал-лейтенанты Игорь Ромашкин «Полицейский дядя Стёпа»   битеуроссей сабий чыгъармачылыкъ конкурсда республикабыздан  хорлагъан сабийлени алгъышлагъанды.

Бу эришиу жамауат советле эмда Россейни Ич ишле министерствосуну регион бёлюмлерини органлары бла бирге жыл сайын бардырылады. Аны мураты полицияны иш бардырыууна жамауатда ахшы оюм къурауду.

Быйыл чыгъармачылыкъ эришиуле 2020 жылда боллукъ Уллу Хорламны юбилейине жораланнгандыла. Битеуроссей конкурсну регион бёлюмюнде Зольский элни школуну 5-чи классыны окъуучусу Амир Озроков хорлагъанды. Аны иши эм игиге саналгъанды. Экинчи жерни Красноармейское элни мектебинде 8-чи классда окъугъанла Мавлюда Байрагдарова бла Махаддина Алиева алгъандыла. Къызла кеслерини ишлерин бирге этип ашыргъандыла конкурсха. Бахсан шахарны 3-чю номерли орта школуну 4-чю классыны окъуучусу Ренат Шоров а ючюнчю жерге тийишли болгъанды.

Дагъыда «За оригинальность исполнения» конкурсда энчи саугъа эм гитче гёжеф Прохладна шахардан бешжыллыкъ Дарья Шрамковагъа берилгенди. 

Лауреатланы бла хорламгъа тийишли болгъанланы КъМР-ни ич ишле министри Игорь Ромашкин бла КъМР-де МВД-ны жамауат советини таматасы Валерий Балкизов алгъышлагъандыла. 
Жыйылыуну ахырында сабийлеге министерствону мекямында экскурсия къуралгъанды. Ала психология регуляция отоуну жокълагъандыла, полицияны иши бла да шагъырей болгъандыла. Тюбешиу суратха тюшюу бла бошалгъанды.