Неофашистлени умутлары толлукъ тюйюлдю

  Украинада эм Донбассда бардырыла тургъан энчи аскер операция не ючюн башланнганды, къоншу къарындаш халкъгъа къайдан чыкъдыла бу неофашистле эм барып тохтагъан миллетчиле бла террористле, деген соруула кёплени жарсытадыла.  Артха бурулуп къарасакъ, ол жерледе миллетчиликни тамырлары терендиле. Германияны канцлери Бисмаркны жюз жыл мындан алгъа айтхан «Россейни хорлар ючюн, андан Украинаны айырыргъа керекди» дегенини магъанасына къарасакъ, Запад  Россейни хорлар, болмаз къалса, къарыусуз этер умутларын бир заманда да юзмегенди. 

Шёндю бола тургъан къаугъаны чыгъыууна, аны ёчюлмей, андан ары жаныууна, бандеровчуланы сауут-саба бла жалчытыугъа артыкъда америкалыланы, ингилизлилени, немислилени эм башхаланы къошумчулукълары уллу болгъанын  белгилерге керекди. Ачыкъ бола келген шартлагъа кёре, ала Украинаны Россейге къажау сюелирге 2014 жылдан бери тынгылы хазырлап тургъандыла. Къужур муратларын шёндю жашыргъан да этмейдиле. Россей бла кюрешни бирге бардырайыкъ деп, Европаны бирси къыралларын да кеслери жанлы этгендиле,  онла бла миллиард долларла тургъан ауур сауутланы тохтаусуз Украинагъа ашырадыла. Былайда ол болум бла байламлы РФ-ни тыш къыраллы ишлерини министри Сергей Лавровну айтханын келтирирге сюеме: «Украинаны сауутла бла жалчытыу-ол жаланда заманны созууду. Эртте-кеч болса да, энчи аскер операция чегине жетдирилип, хорлам бла бошаллыкъды».

Жарсыугъа, бирле ол шартны ангыламайдыла, ангыларгъа да сюймейдиле. Озгъан жайда, сагъынылгъан къаугъада ВСУ-ну алгъа барабыз деген муратлары толмагъандан сора, НАТО шёндю тюрлю-тюрлю сылтаула бла юйрениуле бардырабыз деп, аскер кючлерин Россейни шимал чеклерине жууукълашдырып келедиле, Финляндияны бла Швецияны да кеслерине къошуп. Атом саууту болгъан къырал бла ол тийреледе алай къажау сюелиуню ахыры не бла бошаллыгъыны юсюнден сагъыш да этмей…

Мен оюм этгенден, орус халкъны тёзюмю уллуду. Жети-сегиз жылны ичинде бандеровчула Донбассда жашагъанланы бир тюрлю терсликлери болмай, жаланда кеси тиллеринде сёлешгенлери ючюн, террорчулукъ амалланы хайырлана, ёлтюрюп тургъандыла. Западны оноучулары ол геноцидни билип тургъанлай, Одессада жанлары сау адамланы кюйдюргенде да, донбассчылагъа сепаратистле деп тургъандыла. Къысхасын айтханда, ма ол артыкълыкъланы, неофашистлени  жайылыуларын тохтатыргъа деп башланнган эди энчи аскер операция да. Аны бла байламлы бизни аскерчилерибиз Россейде террорист къауумлагъа саналгъан  «Азов», «Правый сектор» эм башха неофашист полкла къурутулгъан эдиле эм тутмакъгъа алыннган эдиле.

Сейирди, алай ол башда сагъынылгъан неофашист отрядла эки жыйырма миллиондан аслам халкъы болгъан къыралны баштёбен этип, 2014 жылда властьны къолгъа этген эдиле, экинчи дуния урушда фашизм Украинаны халкъына къаллай бир къыйынлыкъ келтиргенин унутуп. 

Миллетчилик, сатхычлыкъ эм мингле бла адамлагъа зарауатлыкъ сынатхан украинлы миллетчилени эм бандеровчуланы къанларында болгъаныны юсюнден  шёндю шартла басмаланадыла. Алагъа кёре, украинлы миллет терроризм озгъан ёмюрню 15-20 -чы жылларында Симон Петлюрадан башланнганды. Артда ол жерли халкъгъа, артыкъда чюйютлюлеге, сынатхан артыкълыгъы ючюн ёлтюрюлген эди…

Белгилерчады, совет власть украинлы миллетчилени аманлыкъчы ишлерин туура этерге хазна сюймегенди, ала адамлагъа сынатханны аз санда кёргюзтюп тургъанды. Сёз ючюн, ала Уллу Ата журт урушну кезиуюнде немисли фашистле бла къаллай къаты байламлыкъ жюрютгенлерин, аланы айтханларын толтуруп, концлагерьледе этген эм кир ишлерин да. Былайда Прибалтика республикалада жашагъан миллетчилени да эсгерирге боллукъду. Ала, бандеровчуладан артха къалмай, немисли фашистлени  барчы-келчилери  болуп, ала буюргъан бир аман ишден артха турмагъандыла.

Уруш бошалгъандан сора, бандеровчуланы бир къаууму америкалылагъа къошулуп да кетгендиле. Алай иги кесеги мында къалгъанды, Сталин аланы Сибирьге да ашыргъан эди. Жарсыугъа, ол ёлгенден сора, Хрущёв 1955 жылда къыралгъа ишчи адамла керекдиле деп, ал кезиуде 50 мингден аслам бандеровчуну тутмакъладан эркин этгенди. Документлеге кёре, артыкъда Запад Украинада ала къыргъан адамланы саны онла бла мингледен атлагъанды, тутулуп тургъан кезиулери уа тёрт-беш жылдан кёп болмагъанды. Нек дегенде совет власть ала бла ахыр кюрешни озгъан ёмюрню 50-чи жылларында бошагъан эди. Ары дери ала агъачлада бугъуп, властьха къажау, аманлыкъчы ишлерин бир да тохтатмагъандыла.

Къыркъынчы жыллада да власть украинлы миллетчилик бла кюрешни къаты бардыргъанды. Сюдню оноуу бла шёндюгю украинлы фашистле табыннган Степан Бандера бла Роман Шухевич эм башхала жокъ этилген эдиле. Белгилерчады, аланы ызларындан келген украинлы миллетчиле ол санда тутмакъладан бош болгъанла да, кир ниетлерин толтурургъа, «москальлагъа» дерт жетдирирге тап кезиуню сакълап тургъандыла. Эсигизде эсе, ол кюн а деменгили къыралыбыз чачылгъан кезиуге 1991 жылны аягъына тюшгенди.

Украинаны алгъыннгы таматасы Леонид Кравчук ол ишге уллу къошумчулукъ этген сунама, Борис Ельцинни да кёллендирип. Ма андан сора башланнганды украинлы миллетчиликни баш кётюрюую. Ол къыралны андан сора башчылары Леонид Кучма, артыкъда Виктор Ющенко уа башда сагъынылгъан башкеслени, жангы Украинаны жигитлери этип, эсгертмелерин да орнатхан эди ара шахарларында. Украинаны алгъыннгы президенти Пётр Порошенко уа Донбассда жашагъанланы террористлеге санагъанды. Эсигизде эсе, ол кезиуден башланнганды мамыр адамлагъа къажау сюелиу эм аланы къырыу.

Россейни Президенти Владимир Путинни Германияны канцлери Олаф Шольц бла тюбешгенде айтханы эсимдеди. «Миллетчиле, фашистлеге табыннганла къайсы къыралда да бардыла, алай  ол къауумлагъа къырал башчыла баш уруп, ала тутхан ызны баш идеологиягъа алып, аманлыкъчы ниетлерин аны бла толтуруп башласала, аллай болумгъа Россей тёзерик тюйюлдю. Нек дегенде Совет Союз фашизмни ууатыугъа миллионла бла адамларыны жанларын салгъанды. Ма аллай зат къайтарылмаз ючюн, бардырылады бюгюнлюкде энчи аскер операция да».

Эртде-кеч болса да, Зеленскийге эм анга ушашлагъа, сюйселе-сюймеселе да, болмачы миллетчиликден айырылыргъа тюшерикди  эм Россейни сауутланнган кючлери алагъа салыннган борчну толтуруп, Украинада мамырлыкъ да тохташдырыллыкъды.

Къонакъланы Хасан.
Поделиться: