Назмула, аламат жырлача, эшитилгендиле

Бу кюнледе Кенжени Маданият юйюнде «КъМР-ни Шуёхлукъ жагъасы» деген аламат аты бла Шимал Кавказны 7-чи регион  арасы фестивалы ётгенди. Аны чеклеринде миллет маданиятны, поэзия кёчюрмелени бла  чыгъармаланы 8-чи Халкъла аралы жаш тёлю конкурсу бардырылгъанды.

 Ол  керти бир аламат байрам кюн эди.  Ары республиканы кёп эллеринден бла районларындан, Шимал Осетия-Алания Республикадан да  сабий къауумла келген эдиле. Быйылгъы фестиваль белгили назмучу Леонид Северни хурметине аталгъанды.

 Сабийлени эм жаш тёлюню поэзияда бла прозада  фахмуларын ачыкълар ючюн къуралгъан быллай фестивальланы бла эришиулени магъаналары бек уллуду. Жаш тёлюбюзню арасында жаза билгенле кёпдюле.  Кеслерини  быллай конкурслагъа жиберип, атларын айтдыргъанлары уа керти да махтаулуду. Эришиуню излемлерине келишип, ариу жарашдырылгъан ишлени башха-башха тилледе чыкъгъан газетледе бла журналлада басмалар амал  болгъаны жаш жазыучылагъа аламат онгду.  Фестиваль бир ненча кесекден къуралгъаны себепли,  ол бир ыйыкъны ичинде Нальчикде бла Нарткъалада бардырылгъанды.

Айтханыбызча, шабат кюн миллет инструментледе согъуулагъа, тепсеулеге бла назму айтыугъа къаралгъанды.  Фестивальны бир кюнюню юсюнден хапарласакъ да, аны сабийледен бай болгъаны къууандыргъанды. Миллет къобузлада согъаргъа юйреннген жаш адамланы  фахмуларын энчи чертирчады. Аланы жыл санлары 9-10 жылдан кёп тюйюл эди. Алай ала, макъамны кереклисича тутуп, къобузну сёлешдирген этген алай ча согъа эдиле.

 Тепсеулеге аталгъан бёлюмю да аламат эди:спорт гимнастиканы амалы бла салыннганладан  башлап  миллет тепсеулеге дери. Энчи тепсеуде бизни таулу къызчыгъыбыз КъМКъУ-ну медицина колледжини окъуучусу  Аппайланы Алина  «Таулу къыз»  деген композициясы бла 1-чи даражалы дипломну лауреаты болгъанды.

 Назму айтыу кесегинде да таулу сабийле кёп къатышхандыла. Ала Чегем, Тырныаууз, Нальчик шахарладан келген эдиле. Ана тиллеринде айтхан назмусу ючюн фестивальны эм гитче келечиси, хар заманда да алчы жерлени алыучу Алтууланы Мустафа болгъанды. Гала-концертге уллу сайлауладан сора тюше эселе сабийле, Мустафа уа ары биринчилени санында болуп тюшгенин айтып къууандыргъан эдиле фестивальны къурагъанла.

Тырныауузда жюрютген сабий эм жаш тёлю чыгъармачылыкъны айнытыу Мокъаланы Магомет  атлы  араны келечилери,  «Тау адетле» деген биригиуню окъуучулары, аламат назму айтып, кеслерине энчи эс бурдургъандыла. Аланы бир къаууму сахнагъа биринчи кере чыгъа эселе да, ол аламат башланнгыч болгъанды. Кеси тилибизде ариу айтылгъан назмула аламат жырча, эшитген къулакъны, сезген жюрекни да къууандыргъандыла. 

Сабийлерибиз быллай эришиулеге къатыша турсала, тиллеринде назму, хапарла да айтыргъа юйренселе, тилибизни сакълаугъа ол себеплик этерикди.   Аны ючюн,  аланы  хазырлагъан, аланы  фестивальгъа келтирген, къатышыр онгла берген ата-аналагъа бла устазлагъа ыспас этерчады.