Ахшы жетишимлери бла къууандыргъандыла

Бу кюнледе «Нальчик» спорт арада аскер эм спорт самбодан регионла аралы турнир болгъанды. Анга жюз эллиден аслам спортчу къатышханды, башха республикаладан да аслам адам келгенди. Бу эришиуле бизни республикада регионла аралы халда экинчи кере бардырыладыла.

 Спортчуланы КъМР-ни аскер самбодан федерациясыны президенти Кючмезланы Азрет  алгъышлагъанды. Быллай турнирле жаш адамлагъа кеслерини сынаргъа иги амалла бергенлерин, спорт жаны бла иги айнытханларын да чертгенди. Эришиулеге келген къонакъланы санында  Россейни аскер самбодан вице-президенти Абти Яндиев да болгъанды. Ол да самбочулагъа уллу жетишимлеге жетерлерин тежегенди, Россейде спортну бу тюрлюсю алчы жерни алгъанын билдиргенди.

Турнирге къатышхан таулу сабийле да спорт бла тынгылы кюрешгенлерин ачыкъ этгендиле. Аланы санында Огъары Жемталаны, Бабугентни, Ташлы-Таланы эм «Эльбрус» спорт клубну сохталары  ахшы эсепле бла къууандыргъандыла. 

Спорт самбо бизни республикада энди айный келгени себепли  ары къатышхан сабийле эркин тутушуу, дзюдо жаны бла жарау этедиле. Кеслерин спортну бу тюрлюсюнде сынап, алчы жерлеге тийишли болгъанла, мындан ары да самбо бла да тири кюреширге сюйгенлерин  айтхандыла.  

Алчы жерлеге тийишли болгъанланы да энчи белгилерчады. Аланы санында «Эльбрус» спорт арада жарау этгенле Бичиланы Къурман, Гыллыланы Азрет бла Мунир, Бёзюланы Алихан бла Исмайыл, Гочаланы Кязим бла Темерлан, Эндрейланы Ислам, Тебердиланы Магомет бла Тамерлан, Байчеккуланы Руслан бла Темерлан, Нёгерланы Алихан, Имран Мендекеев, Отарланы Алан бла Алихан, Балаланы Илияс, Мисирланы Камил, Байчеккуланы Имран бардыла. Аланы тренерле Жантудууланы Азамат бла Жаникаланы Аслан юйретедиле. Ташлы - Таладан Алтууланы Имран, Къазийланы Амир бла Ислам, Гузиланы Башир бла Омар, Маммеланы Ислам. Тренерлери Алтууланы Хызыр.

Бабугентден «Оками» спорт клубну сохталары Къадырланы Алан бла Аллахберди, Бёзюланы Рамазан, Тюменланы Кемран, аланы тренерлери Къарчаланы Альбертди.

Огъары Жемталадан а Занкишиланы Имран аскер самбодан биринчи жерни алгъанды. Андан сора да, Гызыланы Тамерлан, Азаматланы Сулейман, Уяналаны Саид, Таукенланы Салим, Баллиланы Расул, Занкишиланы Ислам, Ибрагим бла Амир, Дамир, Тикаланы Сулейман, Мусукланы Карим, Хибиланы Даниял, Маммеланы Даниял бла Инал, Мисирланы Ибрагим эмда къызчыкъ Хуламханланы Даяна спорт самбода  алчы жерлеге тийишли болгъандыла, аланы тренерлери Жангоразланы Хакимди. 

 - Бу  республикада энди айный келген спортну бир тюрлюсюдю. Бюгюн бардырылгъан турнирге башха республикаладан да, кесибизни сабийле да тири къатышхандыла. Кеслерин  сынап, мындан ары да бу спортда  жарау этерге сюйгенлерин да билдиргенди. Бу ишни мындан ары да тири бардырып турургъа умутлубуз. Нек дегенде, сабийлени тамблагъы кюнлерини юсюнден сагъыш этерге керекбиз. Ала керексиз  затлагъа алданмагъанлай, тюз жолну сайлар ючюн, бош заманларын зырафына къоратмагъанлай, спорт бла тири кюрешип турсала, мындан ары жашауларында жангылмазла деп ышанабыз, - дегенди Кючмезланы Азрет.

Темуккуланы Амина.
Поделиться: