Туман басханда, учхалауукъда жоллада сакъ болургъа

МЧС-ни регионда Баш управлениясындан билдиргенлерича, жууукъ заманда туман басары, жолла бузлауукъ болурлары сакъланады. Аллай кезиуледе жоллада къыйын болумланы саны ёседи. Аны бла байламлы ведомство водительлеге, жаяу жюрюгенлеге да эсгертиуле этиуню дурус кёргенди.

Бек алгъа, машинаны акъырын жюрютюрге керекди, алда чурум неда башха транспорт чыкъса, тохтатыргъа заман болурча. Бузлагъан жолда машинаны терк тохтатыргъа, терк бара тургъанлай рульну бир жанына ашыгъыулу бурургъа жарамайды, алай бла кесигизге, башхалагъа да къоркъуу салыргъа боллукъсуз. Бирси водительлени озаргъа кюрешмегиз, аны хайырындан эсе хатасы кёпдю. Алда баргъан  машинала бла къоркъуусуз араны тутугъуз, белгиленнгенинден къаршы жууукълашмагъыз. Тормоз системаны, терезелени тазалаучуланы, жарыкъ бериучю приборланы, сигнализацияны ишлеулерин эсепде тутугъуз. Эслилик бютюнда адамла жолну жаяу ётген жерледе, юйлени эм билим бериу учрежденияланы къатларында изленеди.

Жаяу жюрюгенле кеслери да быллай болумлада сакъ болургъа тийишлидиле, машина жууукълаша тургъанда,  жолну чабып ётмезге керекди.

Экстренный службаланы телефон номерлери 112.

Кульчаланы Зульфия.
Поделиться: