Энчи аскер операциягъа къатышханлагъа – жангы себеплик

Энчи аскер операция жаны бла ишчи къауум Президентге кёргюзтюллюк докладда СВО-гъа къатышханлагъа, волонтёрлагъа бла БПЛА хазырлагъанлагъа себепликни жангы мадарларын кёргюзтгендиле. Ала аскерчиле эм аланы жууукъларыны, аскерчи бёлюмлени командирлерини эсгертиулерине кёре хазырланнгандыла. 

«Единая Россияны» генсоветини секретары Андрей Турчак айтханыча, доклад къыралны башчысына берилгенди.

- Ишчи къауум СВО-гъа къатышханланы «узакъвостоклу» эм «арктикалы» гектарны алыргъа эркинликни сакъларгъа башламчылыкъны этгенди. СВО-да жан берген батырланы саулукъларына кёре, чекленнген онглары болгъан сабийлерине  эки пенсияны тёлерге кереклисин да белгилегендиле – сакъатлыкъ эм атадан ёксюз къалгъаны ючюн, бюгюнлюкде уа экисинден бири бериледи.  Аскерчини атасына бла анасына регионда себепликни мадарлары тохташдырылгъанда, ала къайда жашагъанлары тергелмезге керекди. Шёндю уа аскерчи бир, ата-анасы башха регионда жашасала, къырал болушлукъну тохташдыргъанда кемчиликле бардыла,-дегенди Турчак.

 Дагъыда СВО-да болгъан дин къуллукъчулагъа гарантияла берилликдиле, волонтёрлагъача. Анга кёре инсан жаралы болса, 3 миллион, жан берсе уа юйюрюне 5 миллион сом тёленеди.

 Ишчи къауум беспилотниклени хазырлагъанланы  НДС-ден эркин этерге кереклисин белгилегендиле докладда.

Аскерде сакъатлыкъ тапханланы ишге алгъанлагъа страховой тёлеулени азайтыргъа деген мадар да барды.   Дагъыда сыйырылгъан сауутланы ууатмай, СВО-гъа ётдюрюрге боллугъун да айтхандыла ишчи къауумну келечилери. «Анда сауутла керек боллукъдула. Бу сорууну Росгвардияны башчысы Виктор Золотов бла сюзгенбиз, ол да аны тюзге санагъанды»,-дегенди Турчак.

 Докладда жылны аллындан бери законланы жарашдырыу жаны бла тамамланнган иш да билдирилгенди. СВО-да жан бергенлени бла белгисиз тас болгъанланы юйюрлерини эркинликлерин сакълауну юсюнден законну проекти  Къырал Думаны къараууна берилгенди. Аны юсюнден башламчылыкъны РФ-ни Президенти этгенин айтырчады.  Энтта сабий аскерчи СВО-да жан бергенден сора туугъан эсе да, аны къырал страхование жаны бла файда алгъанланы тизмесине къошаргъа деген башламчылыкъ этилгенди. Энчи аскер операциягъа берилген мюлкню къырал тёлеуледен эркин этиу жаны бла законопроект да сюзюледи.

СВО-да жаралы болгъан аскерчини юйюрюню келечилерине къошакъ солуу  тохташдырыуну (хакъсыз), СВО-ну ветеранларына бир кере этилген тёлеулени заявлениясыз бериуню  юсюнден   башламчылыкъла Правительствону къараууна берилгенлерин да билдиргенди Андрей Турчак.

 СВО-ну соруулары жаны бла ишчи къауум РФ-ни Президентини буйругъу бла къуралгъанды. Анга башчылыкъны Андрей Турчак этеди. Къауумуна федерал парламентни эки палатасыны, Къоруулау министерствону, жамауат организацияланы келечилери, аскерчи журналистле киргендиле. 

Партияны КъМР-де регион бёлюмюню толтуруучу комитетини башчысы, КъМР-ни Парламентини депутаты Дмитрий Парафилов   KABARDIN-BALKAR.ER.RU сайтха айтханыча, СВО-гъа къатышханлагъа бла аланы юйюрлерине болушлукъ биринчи кюнден да бериледи:

- Бюгюнлюкде «Единая Россия» бирликни юлгюсюн кёргюзтеди. Партияны регионлада битеу бёлюмлери да аскерчилеге, мобилизация бла чакъырылгъанлагъа, аланы юйюрлерине болушлукъну мадарларын толтурадыла. «Ата журтну къоруулаучулары» фондну бёлюмю бла хайырлы байламчылыкъла бу ишни тирилтирге онг бергендиле. Сынау жыйышдыргъанбыз,  аскерчилерибизни эркинликлерин сакълаудан башлап, бу ишни законла бла жалчытыу жаны бла мадарла къуралгъандыла,-дегенди Дмитрий Парафилов.

Тикаланы Фатима хазырлагъанды.
Поделиться: