Таулада ырахат солурча

«Туризм эм къонакъбайлыкъны къурау» миллет проектни хайыры бла Элбрус районну Тегенекли элинде тёрт модуль юйню къурулушу бошалгъанды, деп бидиредиле Курортла эм туризм министерстводан.

Жангы юйле «О-фрейм» халда («А» харфха ушашдырылып) ишленнгендиле, хар биринде бир кереге тёрт адам ырахат эм эркин турурча  жерле  бардыла. Ала таулада солурча битеу керекли онгла бла жалчытылыныпдыла: жылы поллары,  ашханалары, жумушакъ ундурукълары бардыла,  жылы, салкъын этерча онгла да къуралгъандыла. Андан сора да, сабийле ойнарча, машиналаны къоярча  да  майданла хазыр этилгендиле. Жылы кезиуледе уа эшикде шишликле неда башха ашарыкъла этерге да боллукъду.

Эсигизге салайыкъ, миллет проектле Россейни Президенти Владимир Путинни буйругъу бла 2019 жылдан бери бардырыладыла.