Производствода ачыгъанлагъа – автомашинала

Кёп болмай  Социал страхование фондну КъМР-де бёлюмюнде  производствода  ачыгъан Черек райондан экеуленнге жангы «Лада-Гранта» автомашинала берилгендиле. Нальчикден биреуленнге уа кеси транспорт сатып  алгъаны ючюн компенсация тёлегендиле.

- Автомобильле  саулукъларында чекленнген онглары болгъанла жюрюталырча   медико-социал экспертиза учрежденияны  рекомендациясы жарашдырылып  жети жылгъа бериледиле.  Ол кезиуню ичинде фондну бёлюмю аланы отлукъларына, ремонтларына  этилген къоранчланы бир кесегин жабаргъа болушурукъду.  Жети жылдан  сора транспортну иесине жангысын алырча заявка берирге жарайды.  Комиссия аны тийишли кёрсе,  башхасы бериледи, аны бла бирге эскиси да иесине  къалады.   Машинаны адам  кеси  сатып  алыргъа да эркинди. Ол кезиуде фонд аны багъасы тенгли бирни ызына къайтарады,  деп билдиргенди   ФСС-ни бёлюмюню   таматасы  Мурат Кушхов.      

Производствода ачыгъанлагъа  комплексли реабилитация бардырыуну  чеклеринде уа фонд бир кезиулю эмда ай сайын  тёлеуле этеди, дарманларыны, медицина жаны бла керек  аберилени  алыргъа болушады эм санаторийлеге бла курортлагъа путёвкала бла жалчытады.