Ана тилингде оюмлай билемисе?

Ана тилни халкъла аралы кюнюне  жоралап Нальчикни 1-чи номерли гимназиясында эмда Кенже элни Маданият юйюнде «Оюмунгу ана тилингде айтып ангылат» деген ат бла биринчи шахар эришиу бардырылгъанды. Бу иш биринчи кере бардырылады. Жашла бла къызла, къауумлагъа юлешинип, оюмларын  малкъар эмда къабарты тилледе  шатык айтыргъа керек эдиле. Сёзсюз, жарсыугъа, кёплеге ол тынч борч болмагъанды.

КъМР-ни Жарыкъландырыу эмда илму министерствосуну  департаментини ана тилле жаны бла бёлюмю бу ишни  школчула  бир бирни ангыларча амалланы кийирир, жаш тёлюню  арасында миллет эмда дин келишиулюкню кючлендириуге себеплик этер, сабийлени бла жаш адамланы ана тиллерине сейирлерин къозгъар мурат бла башлагъанды.

Эсепле чыгъарылгъандан сора,  хорлагъан  командалагъа эмда билимлери бла башхаладан айырмалы болгъанлагъа   грамотала, эсде къаллыкъ саугъала да берилгендиле.