Жолла мардалагъа келиширча

Къабарты-Малкъарда «Къоркъуусуз эм тынгылы автомобиль жолла» миллет проектге кёре иги кесек иш этилгенди. Бюгюнлюкде аны чеклеринде регион эм  район магъаналы жоллагъа эм кёпюрлеге да   тынгылы ремонт  бардырылады.   

Быйылны юсюнден айтханда, тийишли ишле  40 километр  чакълы бирде    беш участокда барадыла. Андан 14 километри жууукъ заманда битерикди. Жангыртыу ишлени кезиуюнде ишле  комплекс халда тамамланадыла. Баш борчладан бири  жолла айбат эм къоркъуусуз болурча этергеди. Аны бла бирге    жангы технологияла эм   тынгылы материалла хайырланырча да дайым котроль  тохтамайды.  

Арт  жыллада республикагъа келген туристлени санына иги да къошулгъанды. Ол себепден туризм жаны бла маршрутла,  бютюнда къыйын тау участокла,  тап болургъа керекдиле.   Бу жаны бла эм уллу объектледен бирине  Экинчи Чегем  – Булунгу жолну санарчады. Проектге кёре, аны  27 километри жангыртыллыкъды. Быйыл  подряд организацияны келечилери эки километр тенгли бирде Чегем чучхурла орналгъан эм къыйын жерин бошарыкъдыла. Жолну кенгертирикдиле,  тротуарла саллыкъдыла, къарарча, машинала сюелирча майдалла да къураллыкъдыла. Келир жылда уа  аны  Чегем чучхурладан Булунгугъа  да дери кесегине къараллыкъды. Ишлени кезиуюнде  жолну мурдорун кючлерикдиле эм  биринчи къат асфальт да салынырыкъды.

Андан сора да, сагъынылгъан миллет проектге кёре, Бабугентде бла Шордаковода  ара жолла жангыртыллыкъдыла. Дагъыда республиканы жол фондундан бёлюннген ахчагъа 9,3 километр тенгли бирде  Тёбен Черекде  Эски Черек – Котляревская жолгъа къараллыкъды. Сагъынылгъан жоллада  мектеп, амбулатория, клуб, спорт зал  дегенча социал магъаналы учрежденияла орналадыла. 

Саулай алып айтханда, жола жангы излемлеге келиширча боллукъдула. Мурдорларын кючлерикдиле,  бордюрла саллыкъдыла, жаяу жолчукъла ишленирикдиле, улоу тохтагъан жерле сюелтилинирикдиле, темир буруула  тартыллыкъдыла,  кече жарыкъ болурча мадар этилликди эм  жорукъланы билдирген белгиле бла ызла да жерлерин табарыкъдыла.

Эсге  сала айтсакъ, миллет проектге кере,  Къабарты-Малкъарда энтта да жюз километрден аслам жол жангы излемлеге келиширча боллукъду.