Сабий саулукъ сакълау лагерьле ачылгъандыла.

Бу кюнледе сабий саулукъ сакълауну инфраструктурасын жангыртыу жаны бла программаны экинчи кезиуюню эсеплерин чыгъарыугъа жораланнган жыйылыу ётгенди.

Бу программаны чеклеринде сабий саулукъ сакълау лагерьле Къабарты-Малкъарда, Ставрополь крайда, Северная Осетия-Аланияда, Омский, Челябинская эм Самара областьлада ачылгъандыла. Регионланы келечилерини аллында Россейни Федерал Жыйылыууну Федерацияла Советини председатели Валентина Матвиенко бла жарыкъландырыу министр Сергей Кравцов сёлешгендиле.  Бизни республиканы Башчысы Казбек Коков алагъа Къабарты-Малкъаргъа бурулгъан эс ючюн эм бу проектге къатышыргъа берген онглары ючюн да республикада жашагъанланы атындан ыспас этгенди.

Республикада фахмулу сабийлени спорт, илму, искусство жаны бла да хунерлерин ачыкълагъан «Антарес» регион ара да ишленнгенди. Ол «Сабийлени эм жаш тёлюню саулукъларын кючлер, солутур эм окъутур ючюн амалла къурау» федерал программагъа кёре къуралгъанды. Аны 104 жерге деп, аладан экиси да саулукъларында чекленнген амаллары болгъан сабийле ючюн жарашдырылгъан эки корпусу барды.

Эсигизге салайыкъ, «Антарес» ара 2019 жылда «Билим бериу» миллет проектге кёре ачылгъанды. Кеси да Нальчик шахарны курорт жеринде орналгъанды. Мында сабийлени математикадан, физикадан, биологиядан, информатикадан да терен билим берген программагъа кёре окъутадыла.  Аны себепли «Антаресни» окъуучулары Битеуроссей эм регионла аралы кёп тюрлю эришиуледе жаланда алчы жерлеге тийишли боладыла.  Апрельде уа экологиядан Битеуроссей олимпиаданы ахыр урумуна къатышхан сабийле «Антарес» арада жыйыллыкъдыла.

Ёсе келген жаш тёлюню илму жаны бла айнытыуда, тап къуралгъан  онгла бла жалчытыуда аны уллу магъанасы болгъаны сёзсюздю.        

Темуккуланы Асият хазырлагъанды.
Поделиться: